سروس ٹائرز جونیئر نیشنل ٹینس: امیر اور احتشام کے درمیان فائنل کا معرکہ طے
لاہور: پنجاب ٹینس اکیڈمی، باغِ جناح لاہور میں جاری "سروس ٹائرز جونیئر نیشنل ٹینس چیمپئن شپ 2026” کے بوائز انڈر 18 کیٹیگری میں ایچی سن کالج کے امیر مزاری اور کریسنٹ اسکول کے احتشام ہمایوں نے فائنل کے لیے کوالیفائی کر لیا ہے۔
امیر مزاری نے سیمی فائنل میں محمد یحییٰ کے خلاف جارحانہ کھیل پیش کرتے ہوئے 0-6 اور 2-6 سے یکطرفہ کامیابی حاصل کی، جبکہ دوسرے سیمی فائنل میں احتشام ہمایوں نے علیان علی کو 1-6 اور 1-6 سے شکست دے کر فائنل میں جگہ بنائی۔
اسی کیٹیگری کے ڈبلز فائنل میں بھی امیر مزاری اور احتشام ہمایوں کی جوڑی چھائی رہی، جنہوں نے محمد یحییٰ اور انعام قادر کو اسٹریٹ سیٹس میں 2-6 اور 3-6 سے ہرا کر ٹائٹل اپنے نام کیا۔
بوائز انڈر 14 کے سیمی فائنلز میں شایان آفریدی نے محمد معاذ کو 1-4 اور 1-4 سے شکست دی۔ دوسرے میچ میں محمد ایان نے سخت مقابلے کے بعد محمد فیضان کو 1-4، 4-1 اور 1-4 سے ہرا کر اپنی اعصاب مصلحت کا ثبوت دیا۔
گرلز انڈر 14 کیٹیگری میں خدیجہ خلیل نے عنایہ خان کو 0-4 اور 0-4 سے زیر کیا، جبکہ ہاجرہ سہیل نے ایمان شہباز کو 1-4 اور 1-4 سے ہرا کر فائنل میں قدم رکھا۔
بوائز انڈر 12 کے ڈبلز فائنل میں اشتر عالم خان اور محمد دانیال کی جوڑی فاتح رہی، جنہوں نے ممنون باری اور احسان باری کو 2-4 اور 1-4 سے ہرایا۔ انڈر 12 بوائز سنگلز میں مصطفیٰ عزیر رانا نے دانیال عبداللہ کو 0-4 اور 1-4 سے شکست دے کر فائنل کے لیے کوالیفائی کیا۔
گرلز انڈر 12 کے سیمی فائنلز میں ایمان شہباز نے شہرین عمر کو 1-4 اور 1-4 سے، جبکہ شاہ نور عمر نے حفصہ رانا کو 0-4 اور 0-4 سے ہرا کر فائنل میں جگہ بنائی۔ انڈر 10 کیٹیگری میں ابراہیم خان لغاری نے زہران ذیشان کو 0-6 سے ہرا کر اپنی برتری ثابت کی۔
ٹورنامنٹ کے تمام فائنلز کل جمعہ (3 اپریل 2026) کو کھیلے جائیں گے۔ سروس انڈسٹریز کے سی ای او جناب عارف سعید تقریبِ تقسیمِ انعامات میں بطور مہمانِ خصوصی شرکت کریں گے اور نوجوان چیمپئنز کی حوصلہ افزائی کریں گے۔
