بھارت کرکٹرسمریتی مندھانا نے ویمنز کرکٹ میں تاریخ بدل دی،
سب سے زیادہ سنچریوں اور رنز کا ریکارڈ توڑ دیا
بھارت کرکٹرسمریتی مندھانا نے ویمنز کرکٹ میں تاریخ بدل دی،
سب سے زیادہ سنچریوں اور رنز کا ریکارڈ توڑ دیا
صرف 64 گیندیں، 124 رنز اور ریکارڈز کی ایسی بارش کہ ویمنز کرکٹ کی تاریخ ہی بدل گئی! بھارتی اسٹار سمریتی مندھانا نے ہانگ کانگ کے خلاف سنچری جڑتے ہی ایک نہیں بلکہ دو بڑے عالمی ریکارڈ اپنے نام کرلیے۔
بھارتی ویمن کرکٹ ٹیم کی اوپنر بیٹر سمریتی مندھانا نے ویمنز انٹرنیشنل کرکٹ میں نئی تاریخ رقم کرتے ہوئے سب سے زیادہ رنز اور سب سے زیادہ سنچریاں بنانے کے دو بڑے عالمی ریکارڈ اپنے نام کرلیے۔
سمریتی مندھانا نے یہ تاریخی کارنامہ اے سی سی ویمنز ٹی ٹوئنٹی ایشیا کپ 2026 کے گروپ مرحلے میں ہانگ کانگ کے خلاف دبئی انٹرنیشنل کرکٹ اسٹیڈیم میں میچ کے دوران انجام دیا۔
30 سالہ بھارتی اوپنر میچ سے قبل انٹرنیشنل کرکٹ میں 10 ہزار 756 رنز بنا چکی تھیں، تاہم ہانگ کانگ کے خلاف ان کی دھواں دار سنچری نے ویمنز کرکٹ کی تاریخ بدل دی۔
سمریتی مندھانا نے صرف 64 گیندوں پر شاندار 124 رنز کی جارحانہ اننگز کھیلی، جس میں 21 چوکے اور 7 بلند و بالا چھکے شامل تھے۔
اس شاندار اننگز کے ساتھ ہی سمریتی مندھانا نے سابق بھارتی کپتان متھالی راج کا ویمنز انٹرنیشنل کرکٹ میں سب سے زیادہ رنز بنانے کا ریکارڈ توڑ دیا۔
متھالی راج نے اپنے طویل اور شاندار انٹرنیشنل کیریئر میں 12 ٹیسٹ، 232 ون ڈے اور 89 ٹی ٹوئنٹی میچز کھیلتے ہوئے مجموعی طور پر 10 ہزار 868 رنز بنائے تھے۔
تاہم اب سمریتی مندھانا 10 ہزار 880 انٹرنیشنل رنز کے ساتھ ویمنز انٹرنیشنل کرکٹ میں سب سے زیادہ رنز بنانے والی کھلاڑی بن گئی ہیں، جبکہ متھالی راج دوسرے نمبر پر چلی گئی ہیں۔ سمریتی مندھانا نے اسی اننگز کے دوران ایک اور بڑا عالمی ریکارڈ بھی اپنے نام کرلیا۔
ہانگ کانگ کے خلاف 124 رنز کی اننگز ان کے انٹرنیشنل کیریئر کی 18ویں سنچری تھی، جس کے ساتھ انہوں نے ویمنز انٹرنیشنل کرکٹ میں سب سے زیادہ سنچریاں بنانے کا ریکارڈ بھی اپنے نام کرلیا۔
اس سے قبل آسٹریلیا کی سابق کپتان میگ لیننگ اور جنوبی افریقا کی کپتان لورا وولوارٹ 17، 17 انٹرنیشنل سنچریوں کے ساتھ مشترکہ طور پر سرفہرست تھیں۔ اب سمریتی مندھانا 18 سنچریوں کے ساتھ ویمنز انٹرنیشنل کرکٹ کی سب سے زیادہ سنچریاں بنانے والی بیٹر بن گئی ہیں۔
سمریتی مندھانا کی یہ دھواں دار اننگز صرف ایک میچ کی فتح نہیں بلکہ ویمنز کرکٹ کی تاریخ میں ایک نیا باب بن گئی، جہاں بھارتی اسٹار اب رنز اور سنچریوں، دونوں عالمی فہرستوں میں سب سے اوپر پہنچ چکی ہیں۔
