ملتان ریجن کرکٹ ایسوسی ایشن کے انتخابات: ڈاکٹر محمد سلیم تونسوی صدر، محمد ناصر جنرل سیکرٹری منتخب

ملتان ریجن کرکٹ ایسوسی ایشن کے انتخابات:

ڈاکٹر محمد سلیم تونسوی صدر، محمد ناصر جنرل سیکرٹری منتخب

ملتان: ملتان ریجن کرکٹ ایسوسی ایشن کے انتخابات میں میاں منیر گروپ نے کامیابی حاصل کر لی۔ صدارتی نشست پر ڈاکٹر محمد سلیم تونسوی جبکہ جنرل سیکرٹری کے عہدے پر محمد ناصر منتخب ہو گئے۔

ملتان ریجن کے سات اضلاع سے تعلق رکھنے والے 20 ووٹرز نے اپنے حقِ رائے دہی کا استعمال کیا۔ صدارتی انتخاب میں میاں منیر گروپ کے امیدوار ڈاکٹر محمد سلیم تونسوی نے 11 ووٹ حاصل کر کے کامیابی اپنے نام کی، جبکہ محمد ناصر جنرل سیکرٹری منتخب ہوئے۔

انتخابی نتائج کے اعلان کے بعد مسلم کالج بلی والا میں کارکنوں اور حامیوں نے بھرپور جشن منایا۔ اس موقع پر مٹھائی تقسیم کی گئی، بھنگڑے ڈالے گئے اور کامیابی کی خوشی میں پرجوش ماحول دیکھنے میں آیا۔

نو منتخب صدر ڈاکٹر محمد سلیم تونسوی نے کامیابی کے بعد خطاب کرتے ہوئے کہا کہ یہ فتح صرف ان کی نہیں بلکہ پورے ملتان ریجن کے کرکٹ شائقین، کھلاڑیوں اور ساتھیوں کی مشترکہ جدوجہد کا نتیجہ ہے۔

انہوں نے کہا کہ ان کی پہلی ترجیح نوجوان کرکٹرز کو جدید سہولیات فراہم کرنا ہوگی، جس کے تحت ان ڈور اور آؤٹ ڈور پریکٹس کی سہولیات مہیا کی جائیں گی تاکہ ہر گاؤں اور شہر سے باصلاحیت کھلاڑی سامنے آ سکیں۔

انہوں نے کہا کہ اسکول اور کالج کی سطح پر باقاعدہ کرکٹ اکیڈمیاں قائم کی جائیں گی، جہاں معیاری کوچنگ اور جدید ترین آلات فراہم کیے جائیں گے۔ اس کے ساتھ ساتھ ضلعی سطح پر ٹورنامنٹس کا باقاعدہ کیلنڈر مرتب کیا جائے گا تاکہ کھلاڑیوں کو یکساں مواقع میسر آئیں۔

انہوں نے اس عزم کا اظہار بھی کیا کہ پاکستان کرکٹ بورڈ کے ساتھ مکمل تعاون کیا جائے گا تاکہ ملتان ریجن سے قومی ٹیم کے لیے مزید باصلاحیت کھلاڑی سامنے آ سکیں۔

اس موقع پر گروپ لیڈر میاں منیر نے کہا کہ ڈاکٹر محمد سلیم تونسوی ایک قابل، دیانتدار اور باصلاحیت شخصیت ہیں اور انہیں یقین ہے کہ ان کی قیادت میں ملتان کی کرکٹ ایک نئے دور میں داخل ہوگی۔ انہوں نے کہا کہ انتخابات کے دوران کیے گئے تمام وعدوں پر عمل درآمد کیا جائے گا۔

میاں منیر نے بتایا کہ پہلے مرحلے میں ملتان ریجن کے تمام سات اضلاع میں کرکٹ گراؤنڈز کی مرمت اور نئی پچز کی تعمیر کا کام شروع کیا جائے گا۔

اس کے علاوہ انڈر 16 اور انڈر 19 ٹیموں کے لیے پری سلیکشن کیمپس منعقد کیے جائیں گے، جہاں ٹرائلز مکمل شفافیت کے ساتھ ہوں گے۔ انہوں نے کہا کہ مقامی اسپانسرز اور کاروباری برادری کو بھی اس مشن میں شامل کیا جائے گا تاکہ مالی وسائل کی کمی کو دور کیا جا سکے۔

انہوں نے مزید کہا کہ نو منتخب صدر کے ساتھ مل کر ملتان ریجن کو پاکستان کرکٹ کا حقیقی مرکز بنایا جائے گا۔ ان کے بقول یہ کوئی خواب نہیں بلکہ ایک عملی منصوبہ ہے، جس پر جلد کام کا آغاز کر دیا جائے گا۔

دونوں رہنماؤں نے متفقہ طور پر اعلان کیا کہ آئندہ ہفتے پہلی باضابطہ میٹنگ طلب کی جائے گی، جس میں ضلعی کوچز، ریفریز اور سابق کرکٹرز کو شریک کر کے ایک جامع ایکشن پلان تیار کیا جائے گا۔

اس منصوبے میں خواتین کی کرکٹ کے فروغ، انٹر ڈسٹرکٹ لیگ کے آغاز اور موسم سرما میں فلڈ لائٹس کے تحت میچز کے انعقاد کو بھی ترجیحات میں شامل کیا جائے گا۔

آخر میں نو منتخب قیادت نے اس عزم کا اعادہ کیا کہ ووٹرز نے جس اعتماد کا اظہار کیا ہے،

اس پر پوری محنت، دیانت اور لگن کے ساتھ پورا اترا جائے گا اور ملتان ریجن کی کرکٹ کو ترقی کی نئی منزلوں تک پہنچایا جائے گا۔ انہوں نے کہا کہ "ملتان کرکٹ اب، ان شاء اللہ، پیچھے نہیں ہٹے گی۔”