سری لنکا میں دھماکوں کے بعد پاکستان انڈر 19کرکٹ ٹیم کا دورہ مشکلات کا شکار

لاہور(سپورٹس لنک رپورٹ)سری لنکا کے دارالحکومت کولمبو میں ہونے والے بم دھماکوں کے بعد پاکستان کی انڈر 19 کرکٹ ٹیم کا دورہ سری لنکا بھی مشکلات کا شکار ہوگیا۔ترجمان پاکستان کرکٹ بورڈ (پی سی بی) نے سری لنکا میں ہونے والے بم دھماکوں کی شدید الفاظ میں مذمت کی اور اسے ایک بزدلانہ کارروائی قرار دیا۔انہوں نے قومی انڈر19 ٹیم کے دورہ سری لنکا کے حوالے سے کہا کہ یہ دورہ میزبان کرکٹ بورڈ اور حکومت کی جانب سے دی جانے والی سیکیورٹی کلیئرنس سے مشروط ہوگا۔ان کا کہنا تھا کہ دھماکوں کے بعد صورتحال کا جائزہ لیا جارہا ہے، تاہم سیکیورٹی کی مکمل یقین دہانی کے بعد ہی قومی انڈر 19 ٹیم کو سری لنکا بھیجنے کا فیصلہ کیا جائے گا۔اپنی بات کو جاری رکھتے ہوئے ترجمان پی سی بی نے بتایا کہ دورہ سری لنکا سے متعلق ٹیم کی تیاریاں جاری ہیں۔خیال رہے کہ پاکستان کی انڈر 19 ٹیم 30 اپریل کو سری لنکا روانہ ہوگی جہاں وہ 2 چار روزہ جبکہ 3 ایک روزہ میچز کھیلے گی۔پاکستانی ٹیم سری لنکا کی انڈر 19 ٹیم کے خلاف 3 مئی سے 6 مئی تک گال میں پہلا 4 روزہ میچ جبکہ 9 سے 12 مئی تک ہمبنٹوٹا میں دوسرا 4 روزہ میچ کھیلے گی۔دونوں ٹیموں کے درمیان تین میچوں پر مشتمل ایک روزہ میچز کی سیریز کا پہلا میچ 15 مئی اور دوسرا 17 مئی کو ہمبنٹوٹا جبکہ تیسرا میچ 20 مئی کو گال میں کھیلا جائے گا۔یاد رہے کہ 21 اپریل کی صبح کولمبو میں یکے بعد دیگے 8 بم دھماکوں کے نتیجے میں سیکڑوں کی تعداد میں افراد ہلاک جبکہ اس سے بھی بڑی تعداد میں لوگ زخمی ہوگئے تھے۔پاکستان سمیت عالمی دنیا نے ان حملوں کی شدید الفاظ میں مذمت کی اور مرنے والے افراد کے لواحقین کے ساتھ ہمدردی کا اظہار کیا۔