سوکا ورلڈ کپ کی حتمی ٹیم کی تشکیل کیلئے تین شہروں میںاوپن ٹرائیلز کا انعقاد

کراچی (ریاض احمد) ورلڈ گروپ کے تعاون سے لیثررلیگز نیشنل چمپئن شپ کا کامیاب انعقاد ممکن ہوگیا۔ کراچی میں کھیلی گئی نیشنل چمپئن شپ میں چاروں ریجن سندھ بلوچستان، خیبر پختونخوااورپنجاب کی چمپئن ٹیموں عبدل ایف سی ،کراچی(سندھ)، گوادر ایف سی (بلوچستان)، شنواری ایف سی (کے پی کے)اور باٹا کلب لاہور(پنجاب) نے حصہ لیا ۔ کراچی کے وسیع وعریض اور 35 ہزارنشستوں کی گنجائش رکھنے والے پیپلز اسٹیڈیم لیاری میں شائقین کی ایک کثیر تعداد اختتامی تقریب کو دیکھنے کیلئے اسٹیڈیم میں موجود تھی۔میڈیااورلیگز منیجر ریاض احمدکے مطابق میجر جنرل عمر احمد بخاری، ڈی جی رینجرز سندھ کی فائنل میں شرکت نے اس تقریب کو اور بھی چار چاند لگادئے تھے۔ورلڈ گروپ کے گلوبل پیٹرن انچیف میاں محمد سومرو، چیئرمین محمود ٹرنک والا،لارڈ شہزاد، جنرل (ر) ہارون پاشا، شاہزیب ٹرنک والا، انس ٹرنک والا،اسحق شاہ، زیب خان، لیثررلیگز کی ورکنگ ٹیم ودیگر معززین شہراور شخصیات بھی اس موقع پر موجود تھیں۔
پہلا سیمی فائنل عبدل ایف سی اور شنواری ایف سی کے مابین کھیلا گیا جو عبدل ایف سی نے 3-1کی واضح کامیابی کے ساتھ جیت لیا ۔ دوسرے سیمی فائنل میں باٹا کلب کا سامنا گوادر ایف سی سے تھا ۔ باٹا کلب نے 0-1شاندار کارکردگی پیش کرکے گوادر کا سفر تمام کیا ۔ فائنل میں عبدل ایف سی اور باٹا کلب مدمقابل تھیں ۔ سنسنی خیز مقابلے کے بعد مقررہ وقت میں کوئی بھی ٹیم گیند کو جال کی راہ نہ دکھاسکی اور میچ کو فیصلہ کن بنانے کیلئے ٹائی بریکر کا سہارہ لیا گیا جہاں قسمت کی دیوی لاہور کی ٹیم پر مہربان رہی اور 1-2کی فیصلہ کن کامیابی کے ساتھ انہیں بحیثیت نیشنل چمپئن 12تا20اکتوبر یونا ن کے شہر کریٹ میں کھیلے جانے والے سوکا ورلڈ کپ کا ٹکٹ مل گیا۔
فائنل کے اختتام پر مہما ن خصوصی میجر جنرل عمر احمد بخاری ،ڈی جی رینجرز سندھ نے تقریب تقسیم انعامات کے موقع پر اپنے مختصر خطاب میں ورلڈ گروپ اور لیثررلیگز کی صحت مند سرگرمیوں کو فروغ دینے کی کاوشوں کو خراج تحسین پیش کرتے ہوئے کہا کہ امن و امان کے قیام میں کھیل مثبت کردار اداکرتے ہیں۔لیثررلیگز اپنا یہ کردار بہتر انداز میں نبھارہا ہے۔فٹبال کھیل کے فروغ کیلئے سندھ رینجرز لیثررلیگز کے شانہ بشانہ اپنا متحرک کردار ادا کرے گی۔ورلڈ گروپ کے چیئرمین محمود ٹرنک والا نے مہمان خصوصی کے تعاون پر ان سے اظہار تشکر کرتے ہوئی کہا کہ فٹبال کھیل کو بام عروج دینے کیلئے نہ صرف پاکستان بلکہ دنیا بھر میں اپنا فعال کردار ادا کرتا رہے گا۔بعدازاں مہمان خصوصی ڈی جی رینجرز سندھ نے فائنلسٹ ٹیموں کے کپتانوں میں ونر اوررنراپ ٹرافی اور کیش پرائز بالترتیب ایک لاکھ اور 50ہزار روپے پیش کیے۔اختتام تقریب پر آتش بازی کا شاندار مظاہرہ کیا گیا جسے اسٹیڈیم میں موجود شائقین نے بیحد پسند کیا اور لطف اندوز ہوئے۔
78شہروں کی800 ٹیموں نے مجموعی طور پرایونٹ میں حصہ لیا اورفائنل کوالیفائنگ راؤنڈ چار مقامات پر کھیلے گئے سندھ ریجن کے میچز جیکب آباد، کراچی، لاڑکانہ، کنری، پنجاب ریجن کے شکر گڑھ، ملتان، گجرات، کے پی کے ریجن کے پشاور، پنڈی ،داماس،گلکن، صوابی، بلوچستان ریجن کے گوادر، سبی، قلات اورکچلاک میں منعقد ہوئے۔ ٹنڈوجام یونیورسٹی گراؤنڈ پر سندھ ریجن سے عبدل ایف سی کراچی، کے ٹوئنٹی گراؤنڈلاہور گراؤنڈ پرپنجاب ریجن سے باٹا کلب لاہور، ٹوٹل گراؤنڈ ، اسلام آبادگراؤنڈ پرکے پی کے ریجن سے شنواری ایف سی پشاور اور المنتظرگراؤنڈ کوئٹہ پربلوچستان ریجن سے گوادر ایف سی نے سیمی فائنل کیلئے کوالیفائی کیا ۔
سوکا ورلڈ کپ میں مقابلوں کیلئے قومی ٹیم کو عالمی معیار کے مطابق بنانے کیلئے اس میں ملک بھر سے بہترین دستیاب ٹیلنٹ کا میرٹ پر چناؤ کرکے قومی ٹیم کا حصہ بنایا جائے گا ۔جس کیلئے یو کے سے تعلق رکھنے والے غیر ملکی کوچ کیون ریوز جو مانچسٹر یونائیٹڈ اور اسٹاک سٹی جیسے نامور کلبوں کے ساتھ کام کرچکے ہیں اب لیثررلیگز کو جوائن کیا ہے اور سوکا ورلڈ کپ میں پاکستان ٹیم کی کوچنگ اور ملک بھر میں ہونے والے ٹرائیلز کی نگرانی اور دستیاب کھلاڑیوں کے سلیکشن کیلئے تشریف لارہے ہیں جن کی زیر نگرانی کراچی، اسلام آباد اور لاہور میںاوپن ٹرائیلز کا اہتمام کیا گیا ہے ۔قومی ٹیم کو مزید توانائی بخشنے کیلئے دستیاب پاکستان نثراد فٹبالرز جو یورپ میں پروفیشنل لیگز کھیل رہے ہیںاورپاکستان کے سپر اسٹار کی شمولیت کو یقینی بنایا جائے گا۔اس طرح ایک بہترین اور مضبوط قومی ٹیم کی تشکیل کرکے اسے سوکا ورلڈ کپ کے مقابلوںکیلئے تیارکیا جاسکے۔ تاکہ عالمی سطح پر پاکستان کا امیج فٹبال کی دنیا میں بھی ابھر کا سامنے آسکے۔لیثررلیگز کی ورکنگ ٹیم بھی قومی ٹیم کی تشکیل کے مرحلہ میں اپنی اعلیٰ صلاحیتوں کو بروئے کار لارہی ہے اور امید کامل ہے کہ ان کی کاوشیں باآور ثابت ہونگی۔