سپورٹس بورڈ پنجاب کے زیر اہتمام نیشنل یوتھ گیمز 2025 کے لیے کھلاڑیوں کے ٹرائلز کا آغاز
سپورٹس بورڈ پنجاب کے زیر اہتمام نیشنل یوتھ گیمز 2025 کے لیے کھلاڑیوں کے ٹرائلز کا آغاز
ڈائریکٹر جنرل سپورٹس پنجاب خضرافضال چوہدری کی زیر نگرانی پہلی نیشنل یوتھ گیمز اسلام آباد 2025 میں شرکت کے لیے پنجاب کی ٹیموں کے ٹرائلز کا آغاز ہوگیا۔ ٹرائلز نشتر پارک اسپورٹس کمپلیکس لاہور میں جاری ہیں۔
بیڈمنٹن (گرلز اور بوائز) کے ٹرائلز جمنازیم ہال میں منعقد ہوئے جن میں 80 سے زائد کھلاڑیوں نے بھرپور شرکت کی۔ ان میں 50 سے زائد لڑکے اور 30 لڑکیاں شامل تھیں۔ کھلاڑیوں کے درمیان مقابلے بھی کرائے گئے تاکہ ان کا انتخاب مکمل طور پر میرٹ کی بنیاد پر کیا جا سکے۔
ٹیم سلیکشن کے عمل کی نگرانی ٹرائلز کمیٹی کے ارکان، سیکرٹری پنجاب بیڈمنٹن ایسوسی ایشن طیب سہیل، اسسٹنٹ ڈائریکٹر محمد وسیم، ساجد حسین، اور سینئر کھلاڑی ندیم جاوید و عرفان سعید بھٹی نے کی۔
ڈی جی سپورٹس پنجاب خضرافضال چوہدری کا کہنا ہے کہ پنجاب کے کھلاڑیوں کے ٹرائلز 6 سے 20 اگست تک جاری رہیں گے اور کامیاب کھلاڑیوں کے لیے 22 اگست سے 5 ستمبر تک تربیتی کیمپس لگائے جائیں گے،
جن میں ماہر کوچز انہیں مزید تربیت فراہم کریں گے۔ ان کا مزید کہنا تھا کہ پنجاب کے کھلاڑی نیشنل یوتھ گیمز میں بھرپور تیاری کے ساتھ شرکت کریں گے۔
