لاہور میں چوتھے چیف آف دی نیول اسٹاف آل پاکستان ہاکی ٹورنامنٹ 2025 کا آغاز
چوتھا چیف آف دی نیول اسٹاف آل پاکستان ہاکی ٹورنامنٹ آج سے نیشنل ہاکی اسٹیڈیم لاہور میں شروع ہوگیا۔ پاکستان نیوی کے کمانڈر سنٹرل پنجاب ریئر ایڈمرل سہیل احمد عزمی نے گیند کو ہٹ لگا کر ٹورنامنٹ کا باقاعدہ افتتاح کیا۔
یہ ٹورنامنٹ 25 ستمبر سے 4 اکتوبر 2025 تک کھیلا جائے گا جس میں تینوں مسلح افواج، ماڑی انرجیز، رینجرز، پولیس، پورٹ قاسم اور نیشنل بینک آف پاکستان سمیت ملک کی نمایاں 8 ڈپارٹمنٹل ٹیمیں شریک ہیں۔
میچز کی نگرانی کے فرائض پاکستان ہاکی فیڈریشن کے ٹیکنیکل آفیشلز انجام دیں گے۔
مہمانِ خصوصی نے اپنے خطاب میں تمام شریک ٹیموں کو خوش آمدید کہا اور کھیلوں کی اہمیت خصوصاً ہاکی کی اہمیت پر زور دیا جو ہمارا قومی کھیل اور ایک شاندار ماضی کا حامل ہے۔
انہوں نے کہا کہ یہ ٹورنامنٹ کھلاڑیوں کو اپنی صلاحیتوں کے اظہار کے لیے بہترین پلیٹ فارم فراہم کرنے کے ساتھ نوجوانوں میں ہاکی کی اہمیت اجاگر کرے گا اور شائقین کے لیے دلچسپ مقابلے پیش کرے گا۔
ٹورنامنٹ کے پہلے روز پاکستان نیوی اور پورٹ قاسم کے مابین میچ کھیلا گیا جس میں پاکستان نیوی نے 2 کے مقابلے میں 3 گول سے کامیابی حاصل کی۔
یہ ٹورنامنٹ پہلی بار 2016 میں متعارف کروایا گیا اور تب سے یہ قومی ہاکی سرکٹ کا ایک مستقل اور بڑا ایونٹ بن چکا ہے۔ پاکستان نیوی ہمیشہ قومی اور بین الاقوامی سطح پر مختلف کھیلوں کی سرپرستی اور فروغ کے لیے سرگرم کردار ادا کرتی آئی ہے۔
