جنوبی افریقی بولر رباڈا کی تاریخی کارکردگی، 119 سال پرانا ریکارڈ توڑ ڈالا
راولپنڈی: جنوبی افریقہ کے فاسٹ بولر کگیسو رباڈا نے پاکستان کے خلاف دوسرے ٹیسٹ میں شاندار بیٹنگ کرتے ہوئے 119 سال پرانا ریکارڈ توڑ دیا۔
پنڈی اسٹیڈیم میں کھیلے جا رہے میچ میں پاکستان کی پہلی اننگز کے 333 رنز کے جواب میں جنوبی افریقہ کی ٹیم نے 404 رنز بنائے۔ رباڈا 11ویں نمبر پر بیٹنگ کے لیے آئے اور صرف 61 گیندوں پر 71 رنز کی دھواں دار اننگز کھیلی، جس میں 4 چوکے اور 4 چھکے شامل تھے۔
انہوں نے دسویں وکٹ کے لیے متھوسامے کے ساتھ 98 رنز کی قیمتی شراکت قائم کر کے ٹیم کو پہلی اننگز میں 71 رنز کی برتری دلائی۔
رباڈا نے جنوبی افریقی کرکٹ میں 11ویں نمبر پر کھیلنے والے بیٹر کا سب سے بڑا انفرادی اسکور بنا کر برٹ وولگر کا 1906 میں بنایا گیا ریکارڈ توڑ دیا، جب وولگر نے انگلینڈ کے خلاف 62 ناقابلِ شکست رنز بنائے تھے۔
واضح رہے کہ ٹیسٹ کرکٹ میں 11ویں نمبر پر کھیلنے والے بیٹر کا عالمی ریکارڈ آسٹریلیا کے ایشٹن ایگر کے پاس ہے، جنہوں نے 2013 کی ایشیز سیریز میں انگلینڈ کے خلاف 98 رنز اسکور کیے تھے۔
