نظم و ضبط پر سمجھوتہ نہیں ہوگا: شاہین آفریدی کو 10 لاکھ روپے جرمانہ، لاہور قلندرز کا اعلامیہ
لاہور: پاکستان سپر لیگ کی فرنچائز لاہور قلندرز نے ٹیم کے کپتان شاہین شاہ آفریدی پر سیکیورٹی پروٹوکولز کی خلاف ورزی کے باعث 10 لاکھ روپے جرمانہ عائد کر دیا ہے۔ فرنچائز نے ایک رسمی بیان جاری کرتے ہوئے پیشہ ورانہ معیار اور نظم و ضبط برقرار رکھنے کے اپنے پختہ عزم کا اعادہ کیا ہے۔
ترجمان لاہور قلندرز کے مطابق یہ واقعہ 28 مارچ کو ٹیم ہوٹل میں پیش آیا تھا، جس کا فرنچائز انتظامیہ نے فوری نوٹس لیتے ہوئے جامع اندرونی تحقیقات کیں۔
انکوائری کے بعد فرنچائز نے تصدیق کی کہ اگرچہ یہ ایک انفرادی واقعہ تھا جسے میڈیا میں ضرورت سے زیادہ بڑھا چڑھا کر پیش کیا گیا، لیکن احتسابی عمل کو یقینی بنانے کے لیے کپتان شاہین شاہ آفریدی پر رضاکارانہ طور پر جرمانہ عائد کرنے کا فیصلہ کیا گیا ہے۔
بیان میں واضح کیا گیا کہ یہ صورتحال کسی بدنیتی کے بجائے ایک "غلط فہمی” کے نتیجے میں پیدا ہوئی تھی،
تاہم فرنچائز سیکیورٹی ایس او پیز (SOPs) پر عملدرآمد کے حوالے سے "زیرو ٹالرنس” کی پالیسی رکھتی ہے۔ لاہور قلندرز نے اس واقعے کی تفصیلی رپورٹ پاکستان کرکٹ بورڈ (PCB) کو بھی ارسال کر دی ہے تاکہ شفافیت کے عمل کو برقرار رکھا جا سکے۔
فرنچائز نے سیکیورٹی اہلکاروں کی خدمات کو سراہتے ہوئے کہا کہ ٹورنامنٹ کے پرامن انعقاد میں ان کا کردار کلیدی ہے۔ ساتھ ہی اعلامیے میں اس بات پر تشویش کا اظہار کیا گیا
کہ اس معاملے کو عوامی سطح پر غیر ضروری طور پر اچھالا گیا، جس سے نہ صرف ٹیم بلکہ پی ایس ایل کے مجموعی تشخص کو بھی نقصان پہنچنے کا خدشہ ہے۔
لاہور قلندرز نے تمام اسٹیک ہولڈرز اور میڈیا سے ذمہ دارانہ رپورٹنگ کی اپیل کرتے ہوئے کہا ہے کہ مستقبل میں ایسی غلط فہمیوں سے بچنے کے لیے سیکیورٹی حکام اور ٹیموں کے درمیان ہم آہنگی کو مزید بہتر بنایا جائے گا۔ فرنچائز نے واضح کیا کہ اس معاملے پر اب مزید کوئی تبصرہ نہیں کیا جائے گا۔
