ویمن انڈر21 ہاکی چیمپئن شپ 2026 کے لیے آفیشلز کا اعلان
اسلام آباد ; پاکستان ہاکی فیڈریشن کے صدر محی الدین احمد وانی کی ہدایت پر پرائم منسٹر نیشنل ویمن انڈر-21 ہاکی چیمپئن شپ 2026 کے کامیاب انعقاد کے لیے آفیشلز کے پینل کا باقاعدہ اعلان کر دیا گیا ہے۔
یہ چیمپئن شپ 2 جولائی سے 8 جولائی 2026 تک نصیر بندہ ہاکی اسٹیڈیم، اسلام آباد میں کھیلی جائے گی جس میں ملک بھر سے صوبائی اور دیگر الحاق شدہ ایسوسی ایشنز کی ٹیمیں حصہ لیں گی۔
پاکستان ہاکی فیڈریشن کی جانب سے جاری کردہ نوٹیفکیشن کے مطابق، ٹورنامنٹ کے جملہ امور کی نگرانی کے لیے پینل تشکیل دیا گیا ہے، جس میں درج ذیل آفیشلز شامل ہیں:
ٹورنامنٹ ڈائریکٹر: محمد شفیق بھٹی (لاہور) اسسٹنٹ ٹورنامنٹ ڈائریکٹر: راحت خان (لاہور) ایونٹ کوآرڈینیٹر: محمد وقاص شیخ (سکھر) کوآرڈینیٹر: حبیب الرحمن (لاہور) اسسٹنٹ کوآرڈینیٹر: خاور جاوید (گوجرہ)
آرگنائزنگ سیکریٹری: تنزیلہ امیر چیمہ (لاہور) اسسٹنٹ آرگنائزنگ سیکریٹری: چاند پروین (لاہور) شامل ہیں
میچز کو شفاف انداز میں چلانے کے لیے مقرر کیے گئے ٹیکنیکل آفیشلز میں زیب النساء (لاہور)، سونیا خان (واپڈا)، رابعہ قادر (واپڈا)، رفعت مسعود (اسلام آباد)، عبدالملک (گوجرہ)، ریحانہ جعفر (اسلام آباد)، مہوش ایمان (اسلام آباد)، علینہ شاکر (اسلام آباد)، فضیلہ اشرف (سکھر) اور وقاص احمد (پشاور) شامل ہیں۔
امپائرنگ پینل میں بینش حیات (لاہور) بطور امپائرز مینیجر فرائض انجام دیں گی۔ فیلڈ امپائرز کے پینل میں محی الدین (ٹوبہ ٹیک سنگھ)، مظہر وسیم (نکانہ صاحب)، زاہد حمید (واپڈا )، محمود علی (پی آئی اے )، اسد عباس (آرمی)، وجاہت منیر (اسلام آباد)، ساجد رضا (اسلام آباد)، عظیم احمد (اسلام آباد)، فیضان ڈار (آرمی)، حنا پرویز (لاہور)، وقاص بٹ (راولپنڈی) اور عقیلہ نسیم (لاہور) کو شامل کیا گیا ہے۔
پی ایچ ایف کے مطابق، تمام شریک ٹیموں کو ہدایت کی گئی ہے کہ وہ کسی بھی قسم کی کوآرڈینیشن کے لیے ٹورنامنٹ ڈائریکٹر محمد شفیق بھٹی سے رابطہ کریں۔
ٹورنامنٹ کے باقاعدہ آغاز سے قبل یکم جولائی 2006 کو اہم بریفنگ میٹنگز طلب کی گئی ہیں، جس میں امپائرز اور ٹورنامنٹ آفیشلز کی میٹنگ دوپہر 3:00 بجے جبکہ مینیجرز، کپتانوں اور کوچز کی میٹنگ شام 4:00 بجے ہوگی۔
ترجمان پی ایچ ایف نے واضح کیا ہے کہ ایونٹ میں صرف وہی خواتین کھلاڑی شرکت کی اہل ہوں گی جن کی تاریخِ پیدائش یکم جنوری 2006 یا اس کے بعد کی ہے۔
تمام کھلاڑیوں کے لیے رپورٹنگ کے وقت کارآمد پاسپورٹ، 6 عدد حالیہ تصاویر (سفید پس منظر)، ڈومیسائل، بی-فارم اور نادرا کا فیملی رجسٹریشن سرٹیفکیٹ پیش کرنا لازمی ہوگا، بصورتِ دیگر انہیں کھیلنے کی اجازت نہیں دی جائے گی۔
