ایشین گیمز، پہلا کوارٹر فائنل میچ بارش کی نذرہوگیا،
پاکستان کرکٹ ٹیم سیمی فائنل میں پہنچ گئی
پاکستان کو سیمی فائنل کا ٹکٹ لینے کے لیے ایک بھی گیند کھیلنے کی ضرورت نہ پڑی، ایشین گیمز کے کوارٹر فائنل میں مسلسل بارش نے پاکستان اور ہانگ کانگ کا میچ ختم کردیا
اور بہتر رینکنگ کے باعث گرین شرٹس اگلے مرحلے میں پہنچ گئے۔ایشین گیمز 2026 کے مینز کرکٹ ایونٹ میں بارش نے پاکستان اور ہانگ کانگ کے درمیان کوارٹر فائنل میچ کی ایک بھی گیند نہ ہونے دی،
جس کے بعد بہتر رینکنگ کی وجہ سے پاکستان نے سیمی فائنل میں جگہ بنا لی۔جاپان کے شہر نیشّن کے کوروجی اسپورٹس پارک میں پاکستان اور ہانگ کانگ کے درمیان ایشین گیمز کا پہلا کوارٹر فائنل شیڈول تھا،
تاہم مسلسل بارش کے باعث میچ شروع ہونا تو دور کی بات، ٹاس بھی نہ ہوسکا۔میدان کا بڑا حصہ کورز سے ڈھکا ہونے کے باوجود بارش کا سلسلہ جاری رہا، جس کے بعد منتظمین نے میچ منسوخ کرنے کا فیصلہ کیا۔
ٹورنامنٹ کے پلیئنگ کنڈیشنز کے مطابق کوارٹر فائنل میچ بارش یا کسی اور وجہ سے منسوخ ہونے کی صورت میں بہتر عالمی رینکنگ رکھنے والی ٹیم کو سیمی فائنل میں جگہ دی جاتی ہے۔
پاکستان کی رینکنگ ہانگ کانگ سے بہتر ہونے کے باعث قومی ٹیم کو اگلے مرحلے کا ٹکٹ مل گیا۔پاکستان ان چار ٹیموں میں شامل تھا جنہیں بہتر رینکنگ کی بنیاد پر براہِ راست کوارٹر فائنل میں جگہ ملی تھی،
جبکہ بھارت، سری لنکا اور بنگلہ دیش بھی سیڈڈ ٹیموں میں شامل تھے۔دوسری جانب ہانگ کانگ نے گروپ بی میں تین ٹیموں کے درمیان مقابلوں کے بعد کوارٹر فائنل میں جگہ بنائی تھی۔
ہانگ کانگ نے ملائیشیا کو 8 وکٹوں سے شکست دی، تاہم عمان کے ہاتھوں اسے 41 رنز سے شکست کا سامنا کرنا پڑا تھا۔پاکستان اب سیمی فائنل میں چوتھے کوارٹر فائنل کی فاتح ٹیم کا سامنا کرے گا،
جہاں بنگلہ دیش اور ملائیشیا کی ٹیمیں مدمقابل ہوں گی۔یوں بارش پاکستان اور ہانگ کانگ کے درمیان مقابلے کی راہ میں آ گئی، لیکن بہتر رینکنگ نے گرین شرٹس کو بغیر گیند کھیلے سیمی فائنل میں پہنچا دیا، جہاں اب نظریں فائنل کے ٹکٹ پر ہوں گی۔
