ستاروں کے جھرمٹ میں کوہلی اور انوشکاکے استقبالیے کی تقریب

بھارتی کرکٹر ویرات کوہلی اور اداکارہ انوشکا شرما کے ممبئی میں ہونے والے استقبالیے میں شوبز اور کرکٹ کی نامور شخصیات نے شرکت کی۔

نوبیاہتا جوڑی کا پہلا استقبالیہ 21 دسمبر کو نئی دہلی میں ہوا تھا جہاں بھارتی وزیر اعظم نریندر مودی سمیت کئی نامور ستارے اور خاندان کے قریبی لوگ شریک تھے۔

ممبئی میں ہونے والے استقبالیے کی تقریب مہنگے ترین سینٹ ریگس ہوٹل میں منعقد کی گئی جس میں بھارتی کرکٹ ٹیم کے کھلاڑیوں اور شوبز کی نامور شخصیات نے شرکت کی۔

تقریب میں کرکٹر سچن ٹنڈولکر، انیل کمبلے، مہندرا سنگھ دھونی، وریندر سہواگ، سنیل گواسکر سمیت دیگر کھلاڑیوں اور ان کے اہل خانہ موجود تھے۔

بالی وڈ اداکاروں میں ریکھا، مادھوری ڈکشٹ، سری دیوی، بھومن ایرانی، موسیقار اے آر رحمٰن، ایشوریارائے بچن، ابھیشیک بچن، فلمساز بونی کپور، کرن جوہر، ہدایت کار انوراگ کشیپ، سدھارت ملہوترا، سارہ علی خان سمیت کئی اداکار تقریب میں جلوہ گر ہوئے۔

یاد رہے کہ انوشکا اور ویرات نے 11 دسمبر کو اٹلی کے پر فضا مقام پر شادی کی تھی اور ٹوئٹر کے ذریعے مداحوں کو شادی کی خبر دی تھی۔