شارلٹس ول اوپن سکواش چیمپئن شپ ؛ عاصم خان کی کوارٹر فائنل تک رسائی

شارلٹس ول اوپن سکواش چیمپئن شپ میں پاکستان کے عاصم خان نے بڑا اپ سیٹ کرتے ہوئے سیکنڈ سیڈ مصر کے یحییٰ النواسانی کو سنسنی خیز مقابلے میں شکست دے کر کوارٹر فائنل تک رسائی حاصل کر لی۔

امریکی ریاست ورجینیا میں جاری اس ٹورنامنٹ میں عاصم نے مضبوط مصری حریف کو ایک گھنٹے پر محیط سخت مقابلے کے بعد زیر کیا۔

عاصم خان نے یحییٰ النواسانی کو 11-7، 4-11، 11-6، 7-11 اور 11-7 کے سکور سے شکست دی، ان کی اس شاندار فتح نے انہیں ٹورنامنٹ کے کوارٹر فائنل میں پہنچا دیا ہے۔

دوسری جانب پاکستان کے ایک اور کھلاڑی عشب عرفان دوسرے راؤنڈ میں سیڈ نمبر 7 مصر کے ابراہیم الکبانی سے شکست کھا گئے، ان کو 11-8، 11-7، 7-11 اور 11-7 کے سکور سے شکست کا سامنا کرنا پڑا۔

واضح رہے کہ شارلٹس ول اوپن سکواش ٹورنامنٹ کی مجموعی انعامی رقم 28750 ڈالرز ہے اور دنیا بھر کے سکواش کھلاڑی اس ایونٹ میں شریک ہیں۔