ہیڈ کوچ عاقب جاوید کے تجربے سے ٹیم کو بہت فائدہ ہوگا ; محمد رضوان

پاکستان وائٹ بال ٹیم کے کپتان محمد رضوان نے کہا ہے کہ نوجوان کھلاڑیوں کے پاس موقع ہے کہ زمبابوے کے خلاف اچھا پرفارم کریں،محمد رضوان

پریس کانفرنس کرتے ہوئے وائٹ بال ٹیم کے کپتان محمد رضوان نے کہا کہ سینئر کھلاڑیوں کا خلا پر کرنا آسان نہیں، آسٹریلیا کے خلاف سیریز جیتنے کے بعد مورال بلند ہے۔

محمد رضوان نے کہا کہ کوشش ہوگی چیمپئنز ٹرافی کے لیے اچھی ٹیم بنائیں،غیر ملکی سیریز پر کنڈیشنز مختلف ہوتی ہیں۔

انہوں نے کہا کہ عاقب جاوید سے ملاقات ہوئی ہے، عاقب جاوید نے کہا ہے جیسے آسٹریلیا میں کھیلے ہیں زمبابوے کے خلاف بھی ویسے ہی کھیلیں۔

قومی کرکٹ ٹیم کے کپتان محمد رضوان نے امید ظاہر کی ہے کہ ہیڈ کوچ عاقب جاوید کے تجربے سے ٹیم کو بہت فائدہ ہوگا۔

زمبابوے کے شہر بلاوائیو میں میزبان ٹیم کے خلاف ون ڈے سیریز سے قبل ایک پریس کانفرنس کرتے ہوئے کپتان محمد رضوان نے کہا کہ عاقب جاوید ایک زمانے سے ہیڈ کوچنگ کررہے ہیں، عاقب جاوید نے کہا ہے کہ وہ زیادہ چیزوں کو تبدیل نہیں کریں گے بلکہ صرف ضرورت کے مطابق کریں گے۔

محمد رضوان کا کہنا تھا کہ عاقب جاوید کو 1992 کے ورلڈ کپ کا تجربہ بھی ہے جو وہ ہمارے ساتھ شیئر کریں گے، اس سے پہلے وہ ہمارے بولرز شاہین آفریدی، حارث رؤف اور احمد دانیال کے ساتھ کام کرچکے ہیں، امید ہے کہ ان چیزوں سے ہمیں بہت فائدہ ہوگا۔

کپتان محمد رضوان کا مزید کہنا تھا کہ آسٹریلیا میں جو کرکٹ کھیلی وہ اب ماضی بن چکا ہے، ملک سے باہر سیریز میں چیلنجز ہوتے ہیں، پچ اور کنڈیشنزکا میزبان ٹیم کو فائدہ ہوتا ہے، بطور پروفیشنل کھلاڑی آپ کو اس طرح کے چیلنجز کے لیے تیار رہنا چاہیے۔

انہوں نے کہا کہ آسٹریلیا کےخلاف سیریز سے ملنے والا اعتماد اس سیریز میں بھی برقرارکھنے کی کوشش کریں گےاور یہاں بھی اچھا پرفارم کرنے کی کوشش کریں گے۔

انہوں نے کہا کہ ہمارے لیے چیلنج یہ ہے کہ ہم ایک نوجوان ٹیم کے ساتھ آئے ہیں، نوجوان کھلاڑیوں کے لیے اچھا موقع ہے، سینیئر کھلاڑیوں کی کمی پوری کرنا آسان نہیں، امید ہے کہ اس سیریز سے پاکستان کو نئے سپر اسٹارز ملیں گے۔

محمد رضوان نے کہا کہ جنوبی افریقہ کےخلاف سیریز میں ٹیم کو ایک شکل میں لے کر آئیں گے، کوشش کریں گے کہ اس سیریز سے چیمپیئنز ٹرافی کے لیے کچھ نہ کچھ حاصل کریں، ہمارے نوجوان کھلاڑی ڈومیسٹک اور شاہینز میں پرفارم کرکے آئے ہیں۔

واضح رہے کہ قومی کرکٹ ٹیم کپتان محمد رضوان کی قیادت میں ان دنوں زمبابوے کے شہر بلاوایو میں موجود ہے، جہاں وہ 24 نومبر سے 5 دسمبر تک میزبان ٹیم کے خلاف 3 ون ڈے اور 3 ٹی20 میچوں کی سیریز کھیلے گی۔

پاکستان اور زمبابوے کے درمیان پہلا ون ڈے 24 نومبر، دوسرا ون ڈے میچ 25 نومبر اور آخری ون ڈے میچ 28 نومبر کو کھیلا جائے گا۔ دونوں ٹیموں کے مابین پہلا ٹی20 میچ یکم دسمبر، دوسرا ٹی20 میچ 3 دسمبر اور آخری ٹی20 میچ 5 دسمبر کو کھیلا جائے گا۔

تمام ون ڈے اور ٹی20 میچز زمبابوے کے شہر بلاوایو میں کھیلے جائیں گے۔