طلحہ احمد بٹ پلیئر آف دی ٹورنامنٹ قرار، زمزمہ گراؤنڈ میں شاندار فائنل مقابلہ
اویس ٹائیگرز نے اویس آٹو موبائلز ٹرافی 2026 کا ٹائٹل اپنے نام کر لیا
کراچی (اسپورٹس رپورٹر ریحان اکرم) کراچی کے علاقے کلفٹن میں منعقدہ اویس آٹو موبائلز ٹرافی 2026 کا ٹائٹل اویس ٹائیگرز نے شاندار کارکردگی کا مظاہرہ کرتے ہوئے اپنے نام کر لیا، جبکہ ٹورنامنٹ میں نمایاں کھیل پیش کرنے پر طلحہ احمد بٹ کو پلیئر آف دی ٹورنامنٹ قرار دیا گیا۔
زمزمہ گراؤنڈ میں کھیلے گئے اس کرکٹ ایونٹ میں نوجوان کھلاڑیوں نے اعلیٰ معیار کے مقابلے پیش کیے اور شائقینِ کرکٹ کی بڑی تعداد نے ہر میچ میں بھرپور دلچسپی لی۔ فائنل مقابلہ انتہائی سنسنی خیز رہا، جہاں اویس ٹائیگرز نے بھرپور کھیل کے ذریعے کامیابی حاصل کی۔
ٹورنامنٹ میں شہر بھر سے مختلف ٹیموں نے شرکت کی، جبکہ منتظمین کا کہنا تھا کہ ایسے ایونٹس نوجوان کھلاڑیوں کے لیے اپنی صلاحیتیں نکھارنے اور آگے بڑھنے کا بہترین موقع فراہم کرتے ہیں۔ انہوں نے مستقبل میں بھی اس طرح کے ٹورنامنٹس کے انعقاد کے عزم کا اظہار کیا۔
میچز کے دوران بلے بازوں کی جارحانہ بیٹنگ اور بولرز کی عمدہ لائن و لینتھ نے مقابلوں کو انتہائی دلچسپ بنائے رکھا اور ہر جانب کرکٹ کا جوش و خروش دیکھنے میں آیا۔
اختتامی تقریب میں کامیاب ٹیم اویس ٹائیگرز کو ٹرافی پیش کی گئی، جبکہ پلیئر آف دی ٹورنامنٹ طلحہ احمد بٹ سمیت دیگر نمایاں کھلاڑیوں میں بھی انعامات تقسیم کیے گئے۔ ٹورنامنٹ خوشگوار یادوں کے ساتھ اختتام پذیر ہوا۔
