پاکستانی ویمن کرکٹر ایمن انور کا بین الاقوامی کرکٹ سے ریٹائرمنٹ کا اعلان

پاکستانی ویمن کرکٹر ایمن انور کا بین الاقوامی کرکٹ سے ریٹائرمنٹ کا اعلان

پاکستان کی خواتین کرکٹ ٹیم کی فاسٹ بولر ایمن انور نے فوری طور پر بین الاقوامی کرکٹ کو خیرباد کہنے کا اعلان کردیا، جبکہ کھیل کے میدان سے رخصتی کے بعد انہوں نے کرکٹ سے وابستگی ایک نئے کردار میں برقرار رکھنے کا فیصلہ کیا ہے۔

پاکستان کرکٹ بورڈ کے مطابق ایمن انور نے اپنے بین الاقوامی کرکٹ کے سفر کا اختتام کردیا ہے۔ انہوں نے پاکستان کی نمائندگی کرتے ہوئے 8 ایک روزہ اور 37 ٹی ٹوئنٹی بین الاقوامی میچز کھیلے۔

ایمن انور نے بین الاقوامی کرکٹ سے علیحدگی کے باوجود کھیل سے اپنا تعلق ختم نہیں کیا بلکہ اب وہ کرکٹ کے میدان میں ایک نئے فرائض سنبھال رہی ہیں۔ وہ کرکٹ ریفری کے طور پر اپنی ذمہ داریاں ادا کررہی ہیں اور اس شعبے میں بھی اپنے سفر کا باقاعدہ آغاز کرچکی ہیں۔

پاکستان کرکٹ بورڈ کے مطابق ایمن انور نے کراچی میں جاری قومی خواتین انڈر 19 ٹورنامنٹ میں خاتون ریفری کی حیثیت سے اپنے نئے کردار کا آغاز کیا۔

اس طرح قومی سطح پر کھلاڑی کی حیثیت سے ملک کی نمائندگی کرنے والی ایمن انور اب میچوں کی نگرانی اور کھیل کے قوانین پر عمل درآمد یقینی بنانے کی ذمہ داری انجام دے رہی ہیں۔

ایمن انور نے رواں سال جنوری میں کرکٹ ریفریوں کے لیے منعقد ہونے والا تربیتی اور شمولیتی کورس بھی کامیابی سے مکمل کیا تھا، جس کے بعد ان کے لیے ریفری کی حیثیت سے فرائض انجام دینے کی راہ ہموار ہوئی۔

فاسٹ بولر کی حیثیت سے قومی ٹیم کے لیے خدمات انجام دینے والی ایمن انور کا کھیل کے میدان میں نیا کردار خواتین کرکٹ میں سابق کھلاڑیوں کے لیے کھیل سے وابستہ رہنے کے بڑھتے ہوئے مواقع کی بھی عکاسی کرتا ہے۔

بین الاقوامی کرکٹ سے ریٹائرمنٹ کے بعد ایمن انور اب بطور کرکٹ ریفری اپنے تجربے کو استعمال کرتے ہوئے خواتین کرکٹ کے مقابلوں میں نئی ذمہ داریاں ادا کریں گی، یوں ان کا کرکٹ سے سفر کھلاڑی سے کھیل کے نگران کے کردار تک جاری رہے گا۔