پی ایف ایف قیادت کے باہمی اختلافات ختم، پاکستان میں فٹبال کی ترقی کے لیے مشترکہ جدوجہد کا عزم
پی ایف ایف قیادت کے باہمی اختلافات ختم، پاکستان میں فٹبال کی ترقی کے لیے مشترکہ جدوجہد کا عزم
لاہور: پاکستان فٹبال فیڈریشن (PFF) کی اعلیٰ قیادت نے آپسی اختلافات فراموش کرتے ہوئے ملک میں فٹبال کے فروغ اور ادارہ جاتی استحکام کے لیے یکجا ہو کر کام کرنے کے عزم کا اعادہ کیا ہے۔
جمعہ کے روز فٹبال ہاؤس لاہور میں پی ایف ایف کے نائب صدر و پنجاب فٹبال ایسوسی ایشن کے صدر نوید اسلم خان لودھی اور نائب صدر پی ایف ایف و سینئر نائب صدر پنجاب ایف اے حافظ ذکاء اللہ نے پی ایف ایف کے صدر سید محسن گیلانی سے اہم ملاقات کی۔
ملاقات کا بنیادی مقصد باہمی اتحاد کو مضبوط بنانا اور پاکستان میں فٹبال کی کھیل کو بلند سطح پر لے جانا تھا۔ اس اہم نشست نے یہ واضح پیغام دیا ہے کہ فیڈریشن کی قیادت اندرونی قیاس آرائیوں سے ہٹ کر صرف فٹبال کی بہتری پر توجہ مرکوز کیے ہوئے ہے۔
رہنماؤں نے صدر سید محسن گیلانی کی قیادت پر مکمل اعتماد کا اظہار کرتے ہوئے ہر سطح پر کھیل کو فعال بنانے کی عزم کی تجدید کی، جو رواں سال مئی میں فیڈریشن کی جانب سے قائم کردہ متحدہ پالیسی کا ہی تسلسل ہے۔
سید محسن گیلانی کے دورِ صدارت میں گراس روٹ فٹبال، ویمنز فٹبال، فُٹسل اور بین الاقوامی سطح پر ٹیم کی پیش رفت میں نمایاں بہتری آئی ہے۔
حال ہی میں قومی مردوں کی ٹیم نے مالدیپ میں منعقدہ ڈائمنڈ جوبلی فٹبال ٹورنامنٹ کے فائنل میں جگہ بنا کر 64 سالہ طویل انتظار کا خاتمہ کیا ہے۔علاوہ ازیں، پی ایف ایف نے ملک بھر میں ڈسٹرکٹ چیمپئن شپس،
صوبائی اور علاقائی ڈھانچے کی مضبوطی اور یوتھ ڈیولپمنٹ کے پروگراموں کے ذریعے ڈومیسٹک فٹبال کی بحالی کا ہمہ گیر منصوبہ بھی تیار کیا ہے۔ جمعہ کو ہونے والا یہ اجلاس فیڈریشن کے اتحاد اور ملک میں فٹبال کے روشن مستقبل کے لیے ایک اہم پیش رفت قرار دیا جا رہا ہے۔
