پہلا ون ڈے: پاکستان نے سری لنکا کو 6 رنز سے شکست دےدی
راولپنڈی (عبدالغفار خان/اسپورٹس لنک پی کے) پاکستان نے راولپنڈی کرکٹ اسٹیڈیم میں کھیلے گئے پہلے ون ڈے میں سنسنی خیز مقابلے کے بعد سری لنکا کو 6 رنز سے شکست دے دی۔
یوں قومی ٹیم نے تین میچوں کی سیریز میں 0-1 کی برتری حاصل کرلی۔
پاکستان نے پہلے بیٹنگ کرتے ہوئے 50 اوورز میں 299 رنز 5 کھلاڑی آؤٹ پر بنائے۔ سلمان آغا نے شاندار بلے بازی کرتے ہوئے ناقابلِ شکست 105 رنز اسکور کیے،
جب کہ حسین طلعت نے اپنی پہلی ون ڈے نصف سنچری بناتے ہوئے 62 رنز جوڑے۔ محمد نواز نے آخر میں صرف 23 گیندوں پر 36 ناٹ آؤٹ رنز بنا کر ٹیم کا مجموعہ 299 تک پہنچایا۔
سری لنکا کی جانب سے وانندو ہسارنگا نے 3 وکٹیں حاصل کیں۔
جواب میں سری لنکن ٹیم ہدف کے تعاقب میں پوری جان لڑاتی رہی مگر مقررہ 50 اوورز میں 9 وکٹوں کے نقصان پر 293 رنز بنا سکی۔
سری لنکا کی جانب سے وانندو ہسارنگا نے جارحانہ کھیل پیش کرتے ہوئے 59 رنز (52 گیندوں، 7 چوکے) بنائے،
جب کہ کامل مشارا 38، سدیرا سماراوکراما 39، اور چرتھ اسالنکا 32 رنز کے ساتھ نمایاں رہے۔
پاکستان کے بولرز نے دباؤ میں بہترین کارکردگی دکھائی — حارث رؤف نے تباہ کن بولنگ کرتے ہوئے 10 اوورز میں 61 رنز دے کر 4 وکٹیں حاصل کیں، نسیم شاہ نے 2 وکٹیں 55 رنز کے عوض،
جب کہ فہیم اشرف نے بھی نپی تلی گیندبازی کرتے ہوئے 2 کھلاڑی آؤٹ کیے۔ محمد نواز کے حصے میں ایک وکٹ آئی۔
سری لنکن اننگز میں 26 وائڈ گیندوں سمیت 31 اضافی رنز بھی شامل تھے، جس سے میچ دلچسپ مرحلے میں داخل ہوا، مگر آخری اوورز میں قومی بولرز نے نروس لمحوں کے باوجود شاندار کنٹرول کے ساتھ ٹیم کو فتح دلائی۔
سلمان آغا کو ان کی شاندار سنچری پر میچ کا بہترین کھلاڑی (Player of the Match) قرار دیا گیا۔
