ڈبلیو ڈبلیو ای پر آخرکار ایک آسیب کی حکمرانی قائم

نیویارک (سپورٹس لنک رپورٹ)ڈبلیو ڈبلیو ای پر آخرکار ایک آسیب کی حکمرانی قائم ہوگئی ہے۔جی ہاں دی فائن (برے وائٹ) نے یونیورسل چیمپئن شپ اپنے نام کرلی ہے اور سیٹھ رولنز کو شکست دے دی ہے۔سعودی عرب میں گزشتہ روز کراؤن جیول ایونٹ کے دوران دونوں ریسلر فالز کاؤنٹ اینی وئیر میچ میں ایک دوسرے کے مدمقابل آئے تھے۔یہ دوسرا موقع تھا جب یہ دونوں یونیورسل چیمپئن شپ کے لیے ایک دوسرے سے ٹکرائے، اس سے قبل گزشتہ ماہ ہیل ان اے سیل ایونٹ میں بھی ان کا مقابلہ ہوا تھا مگر اس کا اختتام ایسا تھا جو مداحوں کو پسند نہیں آیا تھا۔کراؤن جیول میں دونوں کے درمیان ہارڈ کور اسٹائل میچ ہوا جس میں کرسیاں، ہتھوڑے اور دیگر سامان کا بے دریغ استعمال ہوا اور برے وائٹ پورے میچ میں چھائے نظر آئے۔

یہاں تک کہ سیٹھ رولنز کی جانب سے لگاتار مخصوص داؤ اسٹومپ کا استعمال بھی بیکار نظر آرہا تھا۔ایک موقع پر تو لگ رہا تھا کہ میچ کا اختتام ایک بار پھر متنازع انداز سے ہوگا، کیونکہ چیمپئن کی سپرکک کے نتیجے میں دی دائن برقی مصنوعات پر جاگرے اور وہاں سے چنگاریاں نکلنے لگیں، مگر سیٹھ رولنز فائدہ اٹھانے میں ناکام رہے۔اس کے برعکس سیٹھ رولنز ایک بجلی کے جھٹکے کا شکار ہوئے اور برے وائٹ نے ان کے پیچھے ایسے کھڑے ہوئے جیسے کچھ ہوا ہی نہیں اور اپنا داؤ مینڈیبل کلا کے استعمال کرنے کے بعد سیٹھ رولنز کو چت کرکے چیمپئن شپ اپنے نام کرلی۔حیران کن طور پر اب ڈبلیو ڈبلیو ای کی دونوں چیمپئن شپ اسمیک ڈاؤن کے حصے میں چلی گئی ہیں کیونکہ بروک لیسنر اور برے وائٹ دونوں اس برانڈ کا حصہ بن چکے ہیں۔برے وائٹ کا یہ نیا کردار گزشتہ چند ماہ کے دوران تیزی سے مقبول ہوا ہے اور اب دیکھنا ہوگا کہ ڈبلیو ڈبلیو ای کتنے عرصے تک بیلٹ کو ان کے پاس برقرار رکھتی ہے۔