پاکستان ہاکی ٹیم 2026 ورلڈکپ کوالیفائر میچز مصر میں کھیلے گی
پاکستان ہاکی ٹیم اگلے سال مصر میں منعقد ہونے والے ہاکی ورلڈ کپ کوالیفائر میں حصہ لے گی، جس کا مقصد 2026 کے ایف آئی ایچ ہاکی ورلڈ کپ کے لیے اپنی جگہ محفوظ کرنا ہے۔
عالمی سطح پر ہاکی کے سب سے بڑے مقابلے، ایف آئی ایچ ہاکی ورلڈ کپ کا اگلا ایڈیشن جرمنی اور نیدرلینڈز میں منعقد ہوگا، جہاں میزبان جرمنی اپنی موجودہ چیمپئن کی حیثیت سے اعزاز کا دفاع کرے گی۔
چار بار کی عالمی چیمپئن پاکستان ٹیم کوالیفائر کے پول ‘بی’ میں شامل کیا گیا ہے، جس میں انگلینڈ، آسٹریلیا، میزبان مصر، ملائیشیا، امریکا، جاپان اور چین کی ٹیمیں بھی مقابلہ کریں گی۔ مارچ 2026 میں مصر میں ہونے والے اس کوالیفائر سے چار ٹیمیں ورلڈ کپ میں حصہ حاصل کرنے میں کامیاب ہوں گی۔
اس سے قبل پاکستان ہاکی ٹیم عالمی تیاری کے لیے پرو لیگ 26 کے دوسرے مرحلے میں فروری 2026 میں آسٹریلیا کے شہر ہو بارٹ میں ورلڈ چیمپئن جرمنی اور میزبان آسٹریلیا کے خلاف چار میچ کھیلے گی۔ قومی ٹیم کی قیادت اس وقت عماد شکیل بٹ کے ہاتھ میں ہوگی، اور یہ میچز 10 سے 14 فروری تک جاری رہیں گے۔
تاہم، فی الحال ایف آئی ایچ نے مصر میں ہونے والے ہاکی ورلڈ کپ کوالیفائر کی حتمی تاریخوں کا اعلان نہیں کیا ہے، جس کا انتظار شائقین اور ٹیم دونوں کو ہے۔
واضح رہے کہ پاکستان ہاکی ٹیم نے عالمی سطح پر چار بار ورلڈ کپ جیتا ہے: 1971 میں بارسلونا (اسپین)، 1978 میں بیونس آئرس (ارجنٹائن)، 1982 میں ممبئی (بھارت)، اور 1994 میں سڈنی (آسٹریلیا) میں۔ آخری عالمی فتح میں پاکستان کی قیادت اولمپئین شہباز سنیئر نے کی تھی۔
