عمران نذیر کا تیز ترین نصف سنچری کا ریکارڈ ٹوٹ گیا
نیشنل ٹی ٹونٹی کپ کوالیفائر میں عمران نذیر کا کسی بھی پاکستانی بیٹر کی جانب سے تیز ترین ٹونٹی ٹونٹی نصف سنچری کا 21 سالہ ریکارڈ ٹوٹ گیا۔
قذافی سٹیڈیم ،لاہور میں کھیلے جارہے نیشنل ٹی ٹونٹی کپ کوالیفائر میں حیدر آباد ریجن نے پہلے بیٹنگ کرتے ہوئے 8 وکٹوں کے نقصان پر 111 رنز بنائے اور بہاولپور ریجن کو جیت کے لیے 112 رنز کا ہدف دیا۔
بہاولپور ریجن نے مطلوبہ ہدف محض 9.3 اوورز میں حاصل کرلیا۔بہاولپور ریجن کی جانب سے 24 سالہ اوپنر محمد اکرم نے محض 13 گیندوں پر 6 چوکوں اور 4 چھکوں کی مدد سے اپنی نصف سنچری مکمل کی۔
یہ کسی بھی پاکستانی بیٹر کی جانب سے ٹونٹی ٹونٹی کرکٹ میں اسکور کی گئی تیز ترین نصف سنچری تھی۔
اس سے قبل عمران نذیر نے 2005ءمیں سیالکوٹ اسٹالینز کی جانب سے لاہور ایگلز کیخلاف محض 14 گیندوں پر نصف سنچری سکور کی تھی۔
معین الدین نیشنل ٹی ٹونٹی کپ 24-2023ءمیں راولپنڈی کی جانب سے بہالپور کیخلاف 15 گیندوں پر ففٹی اسکور کرکے اس فہرست میں تیسرے جب کہ قومی کرکٹر احمد شہزاد 2012ءکے بنگلہ دیش پریمیئر لیگ سیزن فائنل میں دورنتو راجشاہی کیخلاف 16 گیندوں پر ففٹی اسکور کرکے اس لسٹ میں چوتھے نمبر پر ہیں۔
