باکسر عامر خان نے بین الاقوامی باکسنگ ایونٹ "آزادی فائٹ نائٹ” کا باقاعدہ اعلان کردیا
اسلام آباد ; برطانوی اور پاکستانی باکسر عامر خان نے اسلام آباد اسپورٹس کمپلیکس میں قائم عامر خان باکسنگ اکیڈمی میں ایک اہم پریس کانفرنس کرتے ہوئے 5 ستمبر 2026ء کو ہونے والے بین الاقوامی باکسنگ ایونٹ "آزادی فائٹ نائٹ” کا باقاعدہ اعلان کیا ہے۔
انہوں نے بتایا کہ اس ایونٹ کا بنیادی مقصد پاکستان کے مقامی باکسرز کو بین الاقوامی سطح کا پلیٹ فارم فراہم کرنا ہے تاکہ وہ دنیا بھر میں ملک کا نام روشن کر سکیں۔
پریس کانفرنس کے دوران ایک بڑا ہدف مقرر کرتے ہوئے عامر خان نے کہا کہ ہمارا اصل ہدف 2028ء کے لاس اینجلس اولمپکس (2028 Olympic Games) ہیں،
اور یہ ایک تلخ حقیقت ہے کہ آخری بار کسی پاکستانی باکسر نے 2004ء کے ایتھنز اولمپکس میں شرکت کی تھی، جس کے بعد سے اب تک پاکستان اولمپک باکسنگ کے لیے کوالیفائی نہیں کر سکا۔
اس جمود کو توڑنے اور پاکستان کے ٹیلنٹ کو عالمی دھارے میں لانے کے لیے اس ایونٹ کے ساتھ ہی جناح اسٹیڈیم میں نئی تعمیر شدہ جدید عامر خان باکسنگ اکیڈمی کا باقاعدہ افتتاح بھی کیا جائے گا،
جس کی ربن کاٹنے کی تقریب فائٹس شروع ہونے سے پہلے منعقد ہوگی۔ یہ ایونٹ ہفتہ 5 ستمبر 2026ء کو شام 6:00 بجے شروع ہوگا
جس کے لیے عامر خان نے عوام کے لیے ایک بڑا اعلان کرتے ہوئے کہا کہ اسٹیڈیم میں انٹری بالکل مفت ہوگی اور شائقین کو کسی قسم کی ٹکٹ خریدنے کی ضرورت نہیں ہوگی جبکہ جو لوگ اسٹیڈیم نہیں آ سکتے،
وہ جیو سپر (Geo Super) پر یہ پورا ایونٹ دنیا بھر میں لائیو دیکھ سکیں گے۔ اس فائٹ نائٹ میں کل 10 پروفیشنل مقابلے ہوں گے، جن میں پاکستان کے نامور باکسر عثمان وزیر سمیت ملک بھر کا بہترین ٹیلنٹ ایکشن میں نظر آئے گا
اور اس ایونٹ میں بین الاقوامی سطح کے پاکستانی باکسرز اور خاتون باکسرز بھی رنگ میں اتریں گی۔
پریس کانفرنس کے دوران برطانیہ (انگلینڈ) سے آنے والے باکسر عثمان اسلم (Osman Aslam) اور ڈنمارک سے آنے والے باکسر حارث آفتاب خان (Haris Aftab Khan) بھی اسٹیج پر موجود تھے۔
عامر خان نے پریس کانفرنس کے دوران کامن ویلتھ گیمز کی تاریخ میں پاکستان کے لیے باکسنگ میں پہلا تمغہ جیتنے والی تاریخ ساز خاتون باکسر فاطمہ زہرا سے خصوصی ملاقات کر کے انہیں مبارکباد دی اور انہیں مستقبل میں اپنی اکیڈمی کی طرف سے ہر ممکن تعاون اور جدید ترین عسکری و تکنیکی تربیت فراہم کرنے کا یقین دلایا۔
انہوں نے واضح کیا کہ دنیا بھر سمیت اب انڈیا میں بھی باکسنگ کے بڑے ایونٹس ہو رہے ہیں، جبکہ حقیقت یہ ہے کہ اصل اور قدرتی ٹیلنٹ پاکستان کے پاس ہے اور انہوں نے کراچی کے علاقے لیاری کا دورہ کر کے وہاں کے بے پناہ ٹیلنٹ کو خود دیکھا ہے۔
ان کا کہنا تھا کہ پاکستان کی آبادی بہت زیادہ ہے یہاں سے بہت زیادہ ٹیلنٹ نکل سکتا ہے لیکن اس مستقل ٹیلنٹ کو عالمی سطح پر لانے کے لیے باقاعدہ حکومتی سرپرستی اور سپورٹ ناگزیر ہے،
جس کے لیے ماضی میں وزیر اعلیٰ پنجاب مریم نواز نے بھی ان سے ملاقات کے دوران پاکستان میں باکسنگ کے بنیادی ڈھانچے کو بہتر بنانے اور کھیلوں کے فروغ کے حوالے سے تفصیلی گفتگو کی تھی۔
عامر خان نے عزم ظاہر کیا کہ تمام تر بین الاقوامی مصروفیات کے باوجود اب ان کی پوری توجہ پاکستان پر مرکوز ہے تاکہ یہاں سے 2028ء کے اولمپکس کے لیے فیوچر چیمپئنز تیار کیے جا سکیں،
جبکہ مقامی کمپنیوں کے لیے اسپانسر شپ کے دروازے کھلے ہیں اور اس ایونٹ سے حاصل ہونے والی تمام آمدن پاکستان میں نوجوانوں کے کھیلوں کے فروغ اور فلاحی کاموں پر خرچ کی جائے گی۔
