پاکستان کیخلاف ون ڈے سیریز سے قبل آٰسڑیلیا کیلئے بری خبر

سڈنی(سپورٹس لنک رپورٹ) آسٹریلوی فاسٹ باؤلر جوش ہیزل ووڈ انجری کے باعث پاکستان کے خلاف ون ڈے سیریز سے باہر ہوگئے۔آسٹریلوی پیسر بدستور کمر کی انجری سے نجات پانے کے لئے کوشاں ہیں اور مارچ کے پہلے ہفتے میں شروع ہونے والی بھارت کے خلاف ٹی ٹونٹی سیریز میں انہیں نہ کھلانے کا فیصلہ پہلے ہی کیا جا چکا ہے۔ جوش ہیزل ووڈ بھارت کے خلاف ٹیسٹ سیریز کے دوران کمر کی تکلیف کا شکار ہوئے تھے،وہ بھارت کیخلاف ون ڈے سیریز سے پہلے ہی باہر ہوگئے تھے۔آسٹریلوی میڈیا کے مطابق اب فیصلہ ہوا ہے کہ انہیں پاکستان کے خلاف یو اے ای میں شیڈول 5 ون ڈے میچز میں کھلانے کا خطرہ مول نہیں لیا جائے گا۔جوش ہیزل ووڈ کا کہنا ہے کہ جمعہ کو نیا سکین کروائے جانے پر صورتحال واضح ہوگی تاہم مسلسل بہتری کی طرف گامزن ہوں، پوری کوشش کروں گا کہ ورلڈکپ سے سے قبل وارم اپ میچ کھیلنے کے قابل ہو جاؤں کیوں کہ اگر ایسا موقع مل گیا توردھم میں آنا مشکل نہیں ہوگا۔یاد رہے کہ مارچ میں آسٹریلوی ٹیم نے بھارت کے بعد یو اے ای میں پاکستان کے ساتھ بھی 5 ون ڈے میچز کی سیریز کھیلنا ہے جس میں ڈیوڈ وارنر اور سٹیو سمتھ کی شرکت کابھی امکان ہے