انوکھا ٹی ٹوئنٹی میچ پوری ٹیم 9رنز پر ڈھیر

نئی دہلی (سپورٹس لنک رپورٹ) ٹی ٹونٹی کرکٹ میں چوکوں اور چھکوں کی برسات ہوتی ہے جس کے باعث اسے سب سے دھواں دار فارمیٹ بھی کہا جاتا ہے مگر بھارت میں ہونے والے ایک ٹی ٹونٹی میچ میں پوری ٹیم صرف 9 رنز بنا کرآؤٹ ہو گئی جب کہ مخالف ٹیم نے مقررہ ہدف صرف ایک اوور میں حاصل کر لیا۔بھارتی میڈیا کے مطابق یہ میچ میزورام اور مدھیا پردیش کی ویمن کرکٹ ٹیم کے درمیان پلمیرا کرکٹ گراؤنڈ میں کھیلا گیا جہاں میزورام کی ٹیم 13.5 اوورز میں صرف 9 رنز بنا کر آؤٹ ہو گئی، 9 بلے باز کوئی سکور بنائے بغیر ہی آؤٹ ہوئے جب کہ صرف ایک بلے باز اپوروا بھردواج 6 رنز بنانے میں کامیاب ہوئیں اور باقی تین رنز ’ایکسٹرا‘ کی مد میں ملے،اپوروا بھردواج نے 25 گیندوں کا سامنا کیا اور ایک چوکے کی مدد سے 6 رنز بنائے مگر دوسرے اینڈ سے پے درپے وکٹیں گرتی رہیں اور وہ بے بسی کے عالم میں اپنی ٹیم کی جگ ہنسائی دیکھنے پر مجبور ہو گئیں۔مدھیا پردیش کی ٹیم کے 7 باؤلرز نے گیند بازی کا مظاہرہ کیا جن میں سے صرف ایک باؤلر ہی وکٹ حاصل کرنے میں ناکام رہی جبکہ ٹیم کی سٹرائیک باؤلر ترنگ جھا 4 اوورز میں محض 2 رنز کے عوض 4 وکٹیں حاصل کرنے میں کامیاب ہوئیں۔میزورام کی ٹیم ٹورنامنٹ کے اپنے پہلے میچ میں بھی کچھ اسی طرح کے حالات سے دوچار رہی جو کیرالہ کی ٹیم کیساتھ کھیلا گیا تھا۔ کیرالہ ٹیم کے باؤلرز نے بھی میزورام کی پوری ٹیم کو صرف 24 رنز پر پویلین بھیج دیا تھا اور 10 وکٹ کیساتھ باآسانی میچ میں کامیابی حاصل کی تھی۔اس سے قبل رواں سال13جنوری کو چینی کرکٹ ٹیم ٹی ٹونٹی میچ میں متحدہ عرب امارات کے خلاف محض14رنز بنا کر پوویلین لوٹ گئی تھی جو ٹونٹی ٹونٹی کرکٹ کی تاریخ کا کم ترین سکور تھا ۔