ایچ بی ایل پی ایس ایل 9 ؛  لاہور قلندرز دوسرا میچ بھی ہار گیا ؛ کوئٹہ گلیڈی ایٹرز کی دوسری فتح

پی ایس ایل 9 کے چوتھے میچ میں کوئٹہ گلیڈی ایٹرز نے لاہور قلندرز کو 5 وکٹوں سے شکست دے کر مسلسل دوسری کامیابی حاصل کرلی۔

قذافی اسٹیڈیم میں کھیلے گئے میچ میں لاہور قلندرز کی جانب دیا گیا 188 رنز کا ہدف کوئٹہ گلیڈی ایٹرز نے آخری اوور میں 5 وکٹوں کے نقصان پر حاصل کرلیا۔

  لاہور کے قذافی سٹیڈیم میں ہونیوالے پاکستان سپرلیگ سیزن 9 کے چوتھے میچ میں لاہور قلندرز کے کپتان شاہین شاہ آفریدی نے کوئٹہ گلیڈی ایٹرز کیخلاف ٹاس جیت کر پہلے بیٹنگ کا فیصلہ کیا اور مقررہ 20 اوورز میں 7 وکٹوں کے نقصان پر 187 رنز بنائے۔

کوئٹہ گلیڈی ایٹرز نے 188 رنز کا ہدف آخری اوور میں 5 وکٹوں کے نقصان پر حاصل کرلیا، خواجہ نافے 60 رنز کیساتھ ناقابل شکست رہے، سعود شکیل نے 40 اور جیسن رائے نے 24 رنز بنائے۔

قبل ازیں لاہور قلندرز کی جانب سے صاحبزادہ فرحان 62 اور جہانداد خان 45 رنز کیساتھ نمایاں رہے، سکندر رضا نے 18 ، وین ڈوسن نے 15، شاہین شاہ آفریدی نے 12اور عبداللہ شفیق نے 11رنز بنائے۔

کوئٹہ گلیڈی ایٹرز کی جانب سے عقیل حسین اور محمد حسنین نے دو،دو جبکہ محمد عامر، محمد وسیم اور ابرار احمد نے ایک ایک وکٹ حاصل کی۔
لاہور قلندرز: فخر زمان، صاحبزادہ فرحان، رسی وین ڈیر ڈوسن، عبداللہ شفیق، سکندر رضا، سلمان فیاض، کارلوس براتھویٹ، جہانداد خان، شاہین آفریدی (کپتان)، حارث رؤف، زمان خان۔

کوئٹہ گلیڈی ایٹرز: جیسن رائے، سعود شکیل، خواجہ نافے، ریلی روسو (کپتان)، سرفراز احمد، شیرفین ردرفورڈ، عقیل حسین، محمد وسیم جونیئر، محمد حسنین، محمد عامر، ابرار احمد۔