قومی کھلاڑیوں کو اعلیٰ ترین قومی اعزازات دینے کا اعلان

قومی کھلاڑیوں کو اعلیٰ ترین قومی اعزازات دینے کا اعلان

صدر مملکت کی منظوری کے اعلان کردہ سول ایوارڈ آئندہ سال 23 مارچ 2026ء کو تقاریب میں دیئے جائیں گے 

تفصیلات کے مطابق کھیلوں کے شعبے میں کرکٹر شاہد آفریدی، ثناء میر سمیت 9 کھلاڑیوں کیلئے اعزازات کا اعلان کیا گیا ہے خواتین کی سابق کپتان ثنا میر کو ستارہ امتیاز اور مردوں کے سپر اسٹار شاہد آفریدی کو ہلال امتیاز سے نوازا جائے گا، جو کہ کرکٹ کو نئی شکل دینے اور لاکھوں لوگوں کو متاثر کرنے والے کیریئر کے لیے موزوں پہچان ہے۔

لیجنڈری آل راؤنڈر شاہد آفریدی، جنہوں نے 524 بین الاقوامی میچوں میں پاکستان کی نمائندگی کی اور 2009 میں آئی سی سی مینز ٹی ٹوئنٹی ورلڈ کپ جیتنے والے اسکواڈ کا حصہ تھےکھیل میں ان کی شاندار کامیابیوں کے اعتراف میں ہلال امتیاز سے نوازا جائے گا۔

آفریدی کے علاوہ، معروف کوہ پیما شہروز کاشف، جو 8000 میٹر سے زیادہ کی تمام 14 چوٹیوں کو سر کرنے والے سب سے کم عمر پاکستانی ہیں، اسی طرح مرحوم گھڑ سوار ملک محمد عطا کو ہلال امتیاز سے نوازا جائے گا۔

انٹرنیشنل کرکٹ کونسل (آئی سی سی) کی ہال آف فیمر ثنا میر کو کرکٹ کے میدان میں قوم کے لیے خدمات پر ستارہ امتیاز کے لیے شارٹ لسٹ کیا گیا ہے۔

رپورٹ کے مطابق پاکستان کے کامیاب ترین پیرا ایتھلیٹ حیدر علی کو بھی ستارہ امتیاز کے لیے نامزد کیا گیا ہے۔ حیدر نے پاکستان کے لیے چار تمغے جیتے ہیں، جن میں ان کا سب سے حالیہ تمغہ گزشتہ سال پیرس پیرا اولمپکس میں ڈسکس تھرو میں کانسی کا تمغہ تھا۔

قومی مکسڈ مارشل آرٹسٹ شاہ زیب رند اور کبڈی کھلاڑی محمد سجاد کو ان کی اپنی کامیابیوں پر صدارتی ایوارڈ برائے پرائیڈ آف پرفارمنس (پی اے پی پی) سے نوازا جائے گا۔

اس دوران اسکواش کے کھلاڑی حمزہ خان، شوٹر محسن نواز اور ٹینس کھلاڑی راشد ملک کو تمغہ امتیاز کے لیے نامزد کیا گیا ہے۔ یہ بات قابل ذکر ہے کہ یہ ایوارڈز 23 مارچ 2026 کو یوم پاکستان کے موقع پر پیش کیے جائیں گے۔