جہلم اور سیالکوٹ میں وزیراعظم یوتھ پروگرام کے کرکٹ ٹرائلز، ہزاروں نوجوانوں کی شاندار شرکت
جہلم اور سیالکوٹ میں وزیراعظم یوتھ پروگرام کے کرکٹ ٹرائلز، ہزاروں نوجوانوں کی شاندار شرکت
وزیراعظم یوتھ پروگرام (PMYP) کے تحت لاہور قلندرز کی جانب سے منعقدہ کرکٹ ٹرائلز کا کامیاب سلسلہ سیالکوٹ اور جہلم میں شاندار انداز سے جاری رہا، جہاں ہزاروں باصلاحیت لڑکے اور لڑکیاں اپنے جوہر دکھانے کے لیے پرجوش انداز میں شریک ہوئے۔
ان ٹرائلز کا مقصد نوجوان کھلاڑیوں کو پیشہ ورانہ کرکٹ کے مواقع فراہم کرنا ہے، جسے دونوں شہروں میں غیر معمولی پذیرائی ملی۔ میدانوں میں نوجوانوں کی بڑی تعداد اور ان کا جوش و جذبہ اس بات کا عکاس تھا کہ پاکستان میں کرکٹ کا مستقبل روشن ہے۔
جہلم میں منعقدہ ٹرائلز کی اہمیت مزید بڑھ گئی جب وفاقی وزیر بلال کیانی نے بنفسِ نفیس میزبانی کی، جبکہ افتتاحی دن امریکہ کی ناظم الامور نٹالی اے بیکر کی موجودگی نے اس ایونٹ کو بین الاقوامی سطح پر نمایاں کیا۔
ان کی شمولیت نے نہ صرف نوجوان کھلاڑیوں کا حوصلہ بڑھایا بلکہ کھیلوں کے ذریعے نوجوانوں میں سرمایہ کاری کی اہمیت کو بھی اجاگر کیا۔
لاہور قلندرز کے سی ای او عاطف رانا نے وزیراعظم شہباز شریف، چیئرمین وزیراعظم یوتھ پروگرام رانا مشہود احمد خان اور ہائر ایجوکیشن کمیشن (HEC) کا شکریہ ادا کرتے ہوئے کہا کہ ان کی بھرپور معاونت سے یہ پروگرام ایک شاندار کامیابی بن گیا ہے۔ انہوں نے سیالکوٹ اور جیلہم کے نوجوانوں کا بھی خصوصی شکریہ ادا کیا جن کی بڑی تعداد میں شرکت نے ٹرائلز کو یادگار بنا دیا۔
عاطف رانا نے کہا: "سیالکوٹ اور جہلم میں جوش اور جذبے کی جو فضا دیکھی گئی وہ توقعات سے کہیں بڑھ کر تھی۔ ان شہروں کے نوجوانوں نے جس بڑی تعداد میں آکر اپنے خوابوں کو حقیقت کا روپ دیا، وہ ہمارے لیے باعثِ فخر ہے۔ یہ پلیٹ فارم اس بات کا ثبوت ہے کہ اگر ٹیلنٹ کو موقع دیا جائے تو خواب ضرور سچ ہوتے ہیں۔”
نوجوان کھلاڑیوں نے بھی وزیراعظم، PMYP ٹیم اور لاہور قلندرز کے لیے اظہارِ تشکر کیا اور کہا کہ ایسے اقدامات انہیں اپنے خوابوں کو حقیقت میں بدلنے کا موقع فراہم کر رہے ہیں۔ ان کے مطابق یہ ٹرائلز ان کے لیے کسی خواب سے کم نہیں، جہاں انہیں پیشہ ورانہ رہنمائی اور مواقع حاصل ہو رہے ہیں۔
لاہور قلندرز کی جانب سے پیشہ ور کوچنگ اور جامع جائزے کی فراہمی سے یہ ٹرائلز نہ صرف نئے ٹیلنٹ کو سامنے لا رہے ہیں بلکہ نوجوانوں میں اعتماد، ڈسپلن اور امید کو بھی پروان چڑھا رہے ہیں۔
سیالکوٹ اور جہلم میں اس شاندار کامیابی نے پنجاب کی بھرپور کرکٹ کلچر کو دوبارہ اجاگر کیا اور مستقبل کے پاکستانی اسٹارز تلاش کرنے کے مشن کو مزید تقویت دی ہے۔
