صاحبزادہ فرحان کی ففٹی کے بعد ’گن شاٹ‘ اسٹائل، جشن کی انوکھی وجہ بتا دی
پاکستانی اوپنر صاحبزادہ فرحان نے ایشیا کپ کے سپر فور مرحلے میں بھارت کے خلاف نصف سنچری مکمل کرنے کے بعد گن شاٹ اسٹائل میں جشن منایا جس پر خاصا چرچا ہوا۔
دبئی میں کھیلے گئے میچ میں فرحان نے شاندار 58 رنز بنائے اور اپنی ففٹی مکمل کرتے ہی منفرد انداز اپنایا، جس پر بھارتی شائقین ناخوش دکھائی دیے۔
میچ کے بعد پریس کانفرنس میں صاحبزادہ فرحان نے وضاحت کی کہ وہ عام طور پر نصف سنچری پر جشن نہیں مناتے، لیکن اس بار اچانک ذہن میں خیال آیا تو نیا انداز اپنایا۔
ان کا کہنا تھا کہ وہ جارحانہ کرکٹ کھیلنے کی کوشش کرتے ہیں، چاہے حریف بھارت ہی کیوں نہ ہو، اور وہ اس بات کی پروا نہیں کرتے کہ لوگ اس جشن کا کیا مطلب نکالتے ہیں۔
اپنی کارکردگی پر بات کرتے ہوئے فرحان نے کہا کہ بھارت کے خلاف اننگز کھیل کر اعتماد میں اضافہ ہوا ہے، لیکن اصل خوشی تب ہوتی جب ان کی کارکردگی ٹیم کی جیت میں کردار ادا کرتی۔
انہوں نے کہا کہ سری لنکا کے خلاف بھرپور تیاری ہے اور وہ چاہتے ہیں کہ فائنل میں بھارت سے ایک بار پھر مقابلہ ہو۔
پاکستانی اوپنر نے مزید کہا کہ بیٹنگ آرڈر میں کی گئی تبدیلیوں سے کھلاڑیوں کو اعتماد ملا ہے، اور صائم ایوب بھی اس سے فائدہ اٹھا رہے ہیں۔
واضح رہے کہ اتوار کو کھیلے گئے میچ میں بھارت نے پاکستان کو 6 وکٹوں سے شکست دی تھی، جبکہ پاکستان اب اپنا اگلا میچ سری لنکا کے خلاف کھیلے گا۔
