ایچ بی ایل نے ریکارڈ قائم کر دیا – پی ایس ایل کی ٹائٹل سپانسرشپ برقرار
کراچی، 29 اکتوبر 2025: پاکستان سپر لیگ (پی ایس ایل) اور حبیب بینک لمیٹڈ (ایچ بی ایل) نے ایک بڑی شراکت داری کے نئے مرحلے کا اعلان کیا ہے، جس کے تحت آئندہ دو ایڈیشنز بھی ایچ بی ایل پی ایس ایل 11 اور ایچ بی ایل پی ایس ایل 12 کہلائیں گے۔
اس معاہدے کے مطابق ایچ بی ایل نے آزاد ماہر کے طے کردہ فیئر مارکیٹ ویلیو کے مطابق اپنی سپانسرشپ برقرار رکھنے کا حق استعمال کیا ہے۔
یہ معاہدہ ایچ بی ایل اور پی ایس ایل کے درمیان ایک دہائی سے جاری مضبوط تعلق کی توثیق کرتا ہے۔ ایچ بی ایل 2016 سے لیگ کا واحد اور فخر سے ٹائٹل سپانسر رہا ہے۔ پی ایس ایل کے آغاز سے اب تک ٹائٹل سپانسرشپ کی قدر میں 505 فیصد اضافہ ہو چکا ہے۔
پی ایس ایل کے چیف ایگزیکٹو آفیسر سلمان نصیر نے کہا:
"ہم ایچ بی ایل کے بے مثال تعاون پر انتہائی مشکور ہیں۔ پی ایس ایل کے ساتھ ان کا سفر پاکستان کرکٹ کے اعتماد اور ترقی کی علامت ہے۔ ایچ بی ایل صرف سپانسر نہیں بلکہ ہمارے شراکت دار ہیں اور ہم آئندہ دو سیزنز کو مزید کامیاب بنانے کے لیے پُرعزم ہیں۔”
ایچ بی ایل کے چیف انفارمیشن اینڈ ٹرانسفارمیشن آفیسر، ابرار احمد میر نے کہا:
"ایچ بی ایل دو مزید سالوں کے لیے پاکستان سپر لیگ کا ٹائٹل سپانسر رہنے پر فخر محسوس کرتا ہے۔ ہمارا مقصد اس پلیٹ فارم کے ذریعے نوجوانوں کے خوابوں کو حقیقت بنانا اور ملک بھر میں کمیونٹیز کی خدمت کرنا ہے۔”
ایچ بی ایل کے چیف مارکیٹنگ اینڈ کمیونیکیشن آفیسر علی حبیب نے کہا:
"ایچ بی ایل پی ایس ایل ایک قومی ادارہ بن چکا ہے۔ سپانسرشپ میں توسیع ہمارے عزم اور ‘این ایبلنگ ڈریمز’ کے فلسفے کی عکاسی کرتی ہے۔ ایچ بی ایل ہمیشہ قومی سطح کے منصوبوں کی حمایت کرتا آیا ہے اور آئندہ بھی کرتا رہے گا۔”
