آئی سی سی نے کوڈ آف کنڈکٹ کی خلاف ورزی پر بابراعظم پر جرمانہ عائد کر دیا۔
سابق کپتان بابر اعظم کو سری لنکا کے خلاف راولپنڈی میں کھیلے گئے تیسرے ون ڈے میچ کے دوران آئی سی سی کوڈ آف کنڈکٹ کی خلاف ورزی پر میچ فیس کا 10 فیصد جرمانہ کیا گیا ہے۔
بابر اعظم نے آئی سی سی کوڈ آف کنڈکٹ کے آرٹیکل 2.2 کی خلاف ورزی کی جوانٹرنیشنل میچ کے دوران کرکٹ کے سامان، کپڑوں، گراؤنڈ کے آلات یا فکسچرز کو نقصان پہنچانے سے متعلق ہے۔
اس کے ساتھ ہی بابراعظم کو ڈسپلنری ریکارڈ میں ایک ڈی میرٹ پوائنٹ دیا گیا ہے، یہ گزشتہ 24 ماہ کے دوران ان کا پہلا جرم ہے،یہ واقعہ پاکستان کی اننگز کے 21ویں اوور میں اس وقت پیش آیا جب بابر آؤٹ ہوئے اور غصے میں بیٹ وکٹوں پر دے مارا اور پھر پویلین لوٹ گئے۔
واضح رہے کہ بابر اعظم نے اپنی غلطی تسلیم کرتے ہوئے میچ ریفری علی نقوی کی جانب سے تجویز کردہ سزا قبول کرلی، جس کی وجہ سے باضابطہ سماعت کی ضرورت پیش نہیں آئی۔
آن فیلڈ امپائرز ایلکس وارف اور راشد ریاض، تھرڈ امپائر شرف الدولہ ابن شاہد اور فورتھ امپائر فیصل آفریدی نے بابراعظم کے خلاف چارج عائد کیا تھا۔
