پاکستان کرکٹ ٹیم ورلڈ کپ کے لیے تیار، کپتان سلمان علی آغا کا اعتماد
راولپنڈی: پاکستان کرکٹ ٹیم کے کپتان سلمان علی آغا نے کہا ہے کہ پاکستان کی ٹیم اب مکمل طور پر آئی سی سی ٹی ٹوئنٹی ورلڈ کپ کے لیے تیار ہے۔ سلمان نے یہ بات اتوار کی شب ٹرائی سیریز کے فائنل میں فتح کے بعد میڈیا سے گفتگو کرتے ہوئے کہی۔
کپتان نے کہا کہ پچھلے کئی مہینوں سے ٹی ٹوئنٹی ٹیم کو مضبوط کرنے کے لیے مختلف کھلاڑیوں کو مواقع دیے جا رہے تھے اور اب وہ تمام کھلاڑی جنہیں ٹیم میں شامل کیا گیا ہے،
بہترین پرفارمنس دکھا رہے ہیں۔ “اب مجھے یقین ہے کہ ہماری ٹیم ورلڈ کپ کے لیے پوری طرح تیار ہے، اور ٹیم مینجمنٹ نے وہ 15 کھلاڑی منتخب کر لیے ہیں جو ٹیم کو آگے لے کر چلیں گے۔”
آئندہ سال فروری اور مارچ میں آئی سی سی ٹی ٹوئنٹی ورلڈ کپ بھارت اور سری لنکا میں منعقد ہوگا، تاہم پاکستان کے تمام میچ سری لنکا میں ہی کھیلے جائیں گے جہاں کے پیچز اسپنرز کے لیے سازگار سمجھے جاتے ہیں۔
سلمان علی اغا کو دسمبر 2024 میں ٹی ٹوئنٹی ٹیم کا کپتان بنایا گیا تھا اور تب سے وہ اپنی ٹیم کو تین فائنلز میں فتح دلا چکے ہیں اور ایشیا کی بھارت کے علاوہ تمام ٹیموں کو شکست دے چکے ہیں۔
کپتان نے کہا کہ “پاکستان کرکٹ کی خوش قسمتی ہے کہ ہمارے پاس اس وقت اچھے آل راؤنڈرز موجود ہیں جو پرفارم بھی کر رہے ہیں۔ سری لنکا میں میچز کھیلنے سے ہمیں خاص فائدہ ہوگا۔”
پاکستان اپنی اگلی ٹی ٹوئنٹی سیریز جنوری کے آخر میں اسٹریلیا کے خلاف کھیلے گا، جو ورلڈ کپ سے پہلے ٹیم کی تیاری کے لیے اہم ہوگی۔ امکان ہے کہ اس سے پہلے پاکستان سری لنکا میں بھی تین ٹی ٹوئنٹی میچز کھیلے گا۔
