سال 2017کے اختتام پر اچھی خبر،پاکستان انڈر19 کی آسڑیلیا کیخلاف جیت

سال کے اختتام پر آئی اچھی خبر یہ ہے کہ یوتھ ون ڈےانٹرنیشنل میں پاکستان انڈر19نے آسٹریلیا کو 49 رنز شکست دے دی۔

میلبرن میں کھیلے گئے سیریز کے آخری میچ میں سابق کپتان وسیم اکرم بھی قومی کھلاڑیوں کی حوصلہ افزائی کےلیے اسٹیڈیم میں موجود تaھے۔ سوئنگ کے سلطان نے کھلاڑیوں کو قیمتی مشورے دیئے اور گر کی باتیں بتائیں۔

جب میچ شروع ہوا تو پاکستانی بلے بازوں نے شاندار کھیل پیش کیا، خاص طور پر اوپنر زید عالم نے 128 رنز کی دلکش اننگز کھیلی۔ ان کے علاوہ علی زریاب نے 56 رنز بنائے۔ پاکستان کا اسکور میچ میں 7 وکٹ پر 309 رنز رہا۔

جواب میں آسٹریلوی ٹیم کے اوپنر ہیکنے تو پاکستانی بولرز کے وار سہہ گئے لیکن دیگر کھلاڑی ان کا ساتھ نہ دے سکے۔ یہکنے نے 109 رنز بنائے لیکن ٹیم 9 وکٹ پر 260 رنز ہی بنا سکی ۔

میچ میں پاکستان کی جانب سے سلیمان شفقت نے 3، شاہین شاہ آفریدی نے 2 کھلاڑیوں کو آوٹ کیا۔ پاکستان جونئیرز نے 49 رنز کی فتح کے ساتھ تین میچز کی سیریز بھی دو صفر سے جیت لی ہے۔