پی ٹی وی نے پریذیڈنٹ ٹرافی گریڈ ون ٹورنامنٹ جیت لیا۔
فائنل میں اسٹیٹ بینک کو 3 وکٹوں سے شکست ۔
شامل حسین کی نصف سنچری ، کپتان عماد بٹ کی ذمہ دارانہ بیٹنگ۔
راولپنڈی ۔ پی ٹی وی نے پریذیڈنٹ ٹرافی گریڈ ون ٹورنامنٹ جیت لیا۔
راولپنڈی کرکٹ اسٹیڈیم میں کھیلے گئے پنک بال نائٹ فائنل میں اس نے اسٹیٹ بینک کو 3 وکٹوں سے شکست دے دی۔
پی ٹی وی کو کامیابی کے لیے 153 رنز کا ہدف ملا تھا۔ اس نے تیسرے روز کھیل ختم ہونے پر ایک وکٹ پر 69 رنز بنالیے تھے۔ پانچ روزہ فائنل کے چوتھے روز اس نے جیت کے لیے درکار 84 رنز مزید چھ وکٹوں کے نقصان پر بنالیے۔
شامل حسین جو گزشتہ روز 44 رنز پر ناٹ آؤٹ تھے7 چوکوں کی مدد سے 58رنز بناکر آؤٹ ہوگئے۔ شامل حسین اس ٹورنامنٹ میں ایک ڈبل سنچری ، ایک سنچری اور دو نصف سنچریاں بنانے میں کامیاب رہے۔
وہ سب سے زیادہ رنز بنانے والے بیٹرز میں واپڈا کے ایاز تصور کے بعد دوسرے نمبر پر رہے جبکہ پی ٹی وی کے محمد شہزاد اور وقار حسین سب سے زیادہ رنز بنانے والے بیٹرز میں تیسرے اور چوتھے نمبر پر رہے۔
پی ٹی وی کے لیے ہدف تک پہنچنا آسان ثابت نہ ہوا اور وقفے وقفے سے اس کی وکٹیں گرتی رہیں۔شامل حسین کے علاوہ وقارحسین ( صفر ) محمد محسن ( 19 ) تیمور خان ( 10 ) محمد طحہ ( 15) اور محمد شہزاد ( ایک ) کی وکٹیں گریں تو پی ٹی وی کا اسکور 7 وکٹوں پر 137 رنز تھا۔
کپتان عماد بٹ نے اس موقع پر ذمہ دارانہ بیٹنگ کرتے ہوئے 35گیندوں پر 2چوکوں کی مدد سے 27 رنز ناٹ آؤٹ بناکر اپنی ٹیم کی جیت ممکن بنادی۔
علی عثمان نے ان کا بھرپور ساتھ دیتے ہوئے17 گیندوں پر 8 رنز بنائے اور وہ بھی آؤٹ نہیں ہوئے۔انہوں نے ہی کاشف بھٹی کی گیند پر چھکا لگاکر اپنی ٹیم کو جیت سے ہمکنار کردیا۔
عماد بٹ نے اس سیزن میں بحیثیت کپتان یہ دوسرا ٹورنامنٹ جیتا ہے۔ اس سے قبل ان کی قیادت میں سیالکوٹ نے قائداعظم ٹرافی جیتی تھی۔ اسٹیٹ بینک کی طرف سے کاشف بھٹی نے 58 رنز دے کر 4 وکٹیں حاصل کیں۔محمد عباس نے دو کھلاڑی آؤٹ کیے۔
وکٹ کیپر غازی غوری نے تین کیچز کے علاوہ ایک اسٹمپڈ کیا۔وہ اس ٹورنامنٹ میں کے آر ایل کے سعد بیگ کے بعد دوسرے سب سے کامیاب وکٹ کیپر رہے۔
پی ٹی وی کو ٹورنامنٹ جیتنے پر پچاس لاکھ روپے کی انعامی رقم ملی جبکہ رنراپ اسٹیٹ بینک نے پچیس لاکھ روپے کی انعامی رقم حاصل کی۔
