پاکستانی ایم ایم اے ٹیم لبنان روانہ، BRAVE CF معاہدے سے عالمی سطح پر نئی پیش رفت کا آغاز

پاکستانی ایم ایم اے ٹیم لبنان روانہ، BRAVE CF معاہدے سے عالمی سطح پر نئی پیش رفت کا آغاز

لاہور: پاکستان مکسڈ مارشل آرٹس فیڈریشن (PAKMMAF) کی ٹیم IMMAF ایشین چیمپئن شپ میں شرکت کے لیے لبنان روانہ ہو گئی ہے، جہاں 18 ممالک کے تقریباً 400 کھلاڑی براعظم کے نمایاں ترین مقابلوں میں حصہ لیں گے۔

پاکستان کی نمائندگی دو عالمی میڈلسٹ، شہاب علی اور عبدالمنان کریں گے، جو 2025 کے IMMAF ورلڈ چیمپئن شپ (جارجیا) میں پوڈیم فِنش حاصل کر چکے ہیں۔

وفد کی قیادت PAKMMAF کے صدر اور ٹیم مینیجر عمر احمد کر رہے ہیں، جو ایشین فیڈریشن کے ایگزیکٹو بورڈ کے رکن بھی ہیں۔ پاکستان اس وقت ایشیا میں تیسری پوزیشن پر فائز ہے، جو خطے کی عالمی سطح پر بالادستی کے تناظر میں ایک نمایاں کامیابی ہے۔

گزشتہ سال لاہور میں IMMAF ایشین چیمپئن شپ کی میزبانی پاکستان کے ایم ایم اے سفر کا اہم سنگِ میل بنی، جہاں قومی فائٹرز نے 12 تمغے جیتے،

جن میں بانو بٹ اور ایمان خان کی شاندار کارکردگی قابلِ ذکر رہی۔ اس ایونٹ کو وزیرِاعظم کی جانب سے سرکاری سطح پر تسلیم کیا گیا، جس سے ملک میں ایم ایم اے کی حیثیت مضبوط ہوئی۔

مزید کامیابیوں کے تسلسل میں پنجاب حکومت کی معاونت سے اگست میں ‘پاکستان کومبیٹ نائٹ’ منعقد ہوئی، جس کے ذریعے پاکستانی فائٹرز کو عالمی پلیٹ فارم تک رسائی ملی اور وہ جارجیا، دبئی، بحرین اور اب لبنان میں نمایاں مقابلوں میں شریک ہوئے۔

اگرچہ قومی کھیلوں کا بجٹ 28 ارب روپے سے زائد ہے، تاہم ایم ایم اے اب تک سرکاری فنڈنگ کے بغیر نجی سرپرستی کے ذریعے فروغ حاصل کر رہا ہے۔ اس کے ساتھ عالمی ادارے BRAVE CF، UFC اور PFL پاکستانی ٹیلنٹ کو بین الاقوامی معاہدوں کی پیشکش کر رہے ہیں۔

ادھر PAKMMAF نے حال ہی میں BRAVE کامبیٹ فیڈریشن کے ساتھ تین سالہ اسٹریٹجک شراکت داری طے کی ہے، جس سے پاکستان میں بین الاقوامی ایونٹس منعقد ہوں گے

اور مقامی فائٹرز کو براہِ راست عالمی پلیٹ فارم میسر آئے گا۔ صدر عمر احمد کے مطابق، “ایم ایم اے نوجوانوں کے لیے بین الاقوامی کیریئر کا واضح راستہ فراہم کرتا ہے اور محدود وسائل کے باوجود ہماری کامیابی اس کھیل کی بے پناہ صلاحیت کا ثبوت ہے۔”