سپر ایٹ مرحلہ ، جنوبی افریقا نے بھارت کو عبرتناک شکست دیدی

سُپر 8 میں بڑا اپ سیٹ، جنوبی افریقہ نے دفاعی چیمپئن بھارت کو 76 رنز سے روند ڈالا

آئی سی سی مینز ٹی 20 ورلڈ کپ کے سُپر 8 مرحلے میں جنوبی افریقہ نے شاندار آل راؤنڈ کارکردگی دکھاتے ہوئے دفاعی چیمپئن بھارت کو 76 رنز سے شکست دے کر ایونٹ کا بڑا اپ سیٹ کر دیا۔

188 رنز کے ہدف کے تعاقب میں بھارتی بیٹنگ لائن ریت کی دیوار ثابت ہوئی اور پوری ٹیم صرف 111 رنز پر ڈھیر ہو گئی۔ حیران کن طور پر بھارتی ٹیم اپنے مقررہ اوورز بھی مکمل نہ کھیل سکی اور 6 بلے باز ڈبل فگر میں بھی داخل نہ ہو سکے۔

بھارت کی جانب سے شیوم دوبے 42 رنز کے ساتھ نمایاں رہے، تاہم ان کی اننگز ٹیم کو شکست سے نہ بچا سکی۔ ہاردک پانڈیا اور سوریا کمار یادیو 18، 18 رنز بنا سکے جبکہ ایشان کشن اور رنکو سنگھ صفر پر آؤٹ ہوئے۔ تلک ورما صرف ایک رن بنا سکے۔

جنوبی افریقہ کی جانب سے مارکو یانسن نے تباہ کن باؤلنگ کرتے ہوئے 4 وکٹیں حاصل کیں جبکہ کیشو مہاراج نے 3 کھلاڑیوں کو پویلین کی راہ دکھائی۔

اس سے قبل جنوبی افریقہ نے پہلے بیٹنگ کرتے ہوئے 7 وکٹوں کے نقصان پر 187 رنز اسکور کیے۔ ڈیوڈ ملر 63 رنز کے ساتھ ٹاپ اسکورر رہے، جبکہ ڈیولڈ بریوس نے 45 اور ٹرسٹن اسٹبس نے 44 رنز کی اہم اننگز کھیلی۔

بھارت کی جانب سے جسپریت بمرا نے شاندار باؤلنگ کا مظاہرہ کرتے ہوئے 15 رنز دے کر 3 وکٹیں حاصل کیں، مگر دیگر باؤلرز خاطر خواہ مدد فراہم نہ کر سکے۔

یاد رہے کہ بھارتی ٹیم اس میچ سے قبل ٹی20 ورلڈ کپ میں مسلسل 12 فتوحات کے ساتھ میدان میں اتری تھی، تاہم جنوبی افریقہ نے اس شاندار سلسلے کا خاتمہ کر دیا۔

اب بھارت اپنا اگلا میچ 26 فروری کو زمبابوے سے کھیلے گا، جبکہ جنوبی افریقہ اسی روز ویسٹ انڈیز کے مدمقابل ہوگی۔ یہ فتح جنوبی افریقہ کے لیے نہ صرف اہم ہے بلکہ گزشتہ ورلڈ کپ کے فائنل کا حساب بھی چکتا کرتی ہے۔