فٹ بال کی عالمی جنگ

قدیم مصری، یونانی اور رومن تہذیبوں میں فٹبال سے ملتے جلتے کھیلوں کے اشارے ملتے ہیں،چین میں اسی طرح کا کھیل تسو چو 300 قبل مسیح میں شاہی فوج کے سپاہیوں کی دلچسپی کا مرکز تھا،جاپان میں کیماری مشہور تھا، یونان میں اپسکیروس تھا، میکسیکو اور وسطی امریکا میں ربڑ کی دریافت کے بعد فٹبال کے میچز کا ذکر ملتا ہے، ڈنمارک کے ایک شہزادے کا سر قلم کرنے کے بعد انگلش فوج نے اس کو اپنی ٹھوکروں سے ایک دوسرے کی جانب اچھالا تو لوگوں کو ایک نیا کھیل مل گیا،کھیل کے دوران بہت شور و غل کی شکایتیں شاہی دربار تک پہنچیں تو 14ویں صدی میں اس پر پابندی عائد کر دی گئی جو 1605 میں ختم ہوئی،فٹبال کے قواعد و ضوابط ایلٹن کالج انگلینڈ نے 1815 میں بنائے اور تعیلمی اداروں کے درمیان مقابلے 1820 میں شروع ہو گئے، پہلا باقاعدہ فٹبال میچ 19 دسمبر 1863 کو لندن میں بارنز فٹبال کلب اور رچمنڈ فٹبال کلب کے درمیان کھیلا گیا،انگلینڈ میں ٹورنامنٹ ہوئے اور کھیل انیسویں صدی میں مختلف ملکوں میں پھیلتا گیا، فیفا کا قیام ہوا، بالآخر 1930 میں پہلا ورلڈکپ کھیلا گیا، اس ٹورنامنٹ کا21واں ایڈیشن روس میں جاری اور ٹیمیں برتری کی جنگ لڑ رہی ہیں۔میگاایونٹ شروع ہونے سے قبل فیفا کی نئی عالمی رینکنگ میں دفاعی چیمپئن جرمنی کی ٹیم ٹاپ پوزیشن پر تھی، برازیل دوسرے، بیلجیئم تیسرے، پرتگال چوتھے، ارجنٹائن پانچویں، سوئٹزرلینڈ چھٹے اور فرانس ساتویں، پولینڈ آٹھویں اور سابق عالمی چیمپئن سپین دسویں نمبر کی ٹیم کا اعتماد لئے میگا ایونٹ میں شرکت کیلیے آئے، نویں پوزیشن پر موجود چلی کا سفر کوالیفائرز میں ہی تمام ہوگیا تھا، شائقین بڑے سٹارز سے مزیئن بڑی ٹیموں سے شاندار کارکردگی اور ان کا سفر آسانی سے جاری رہنے کی توقع کررہے تھے لیکن ایونٹ کا آغاز ہوا تو حیران کن نتائج دیکھنے کو ملے۔گروپ ”اے“ میں شامل میزبان روس نے سعودی عرب کو 5-0سے شکست دی، یورا گوئے نے محمد صلاح کے عدم موجودگی کا فائدہ اٹھاکر مصری ٹیم کو 1-0سے زیرکیا، روس کو اپنے دوسرے میچ میں مصر کو زیر کرنے میں زیادہ دشواری نہیں ہوئی، محمد صلاح کا پنالٹی پر گول بھی ٹیم کو 2-1کی شکست سے نہیں بچاسکا، یوراگوئے نے سعودی عرب کا 1-0 سے شکار کرتے ہوئے ایونٹ میں بقا پائی، سعودی عرب اور مصر کا سفر ختم ہوا۔گروپ ”بی“ میں ایران نے مراکش کیخلاف فتح کیساتھ مہم کا پر اعتماد آغاز کیا لیکن کرسٹیانو رونالڈو کی ہیٹ ٹرک نے سپین کو فتح سے دور رکھا، پرتگال نے اگلے معرکے میں مراکش کوزیر کرنے کیلیے کرسٹیانو رونالڈو کا سہارا لیا، سپین نے بمشکل ایران پر قابو پایا۔گروپ ”سی“ میں فرانس نے آسٹریلیا پر 2-0 ، پیرو پر 1-0سے ہاتھ صاف کیا، ڈنمارک نے پیرو کیخلاف واحد گول کی بدولت کامیابی حاصل کی، آسٹریلیا کیخلاف مقابلہ 1-1سے برابر رہا، دونوں ٹیموں نے اگلے مرحلے میں رسائی کے امکانات روشن کئے۔گروپ ”ڈی“ کے میچز میں حیران کن نتائج دیکھنے میں آئے ارجنٹائن کو آئس لینڈ نے زچ کرتے ہوئے مقابلہ 1-1سے برابر کیا، سٹار کھلاڑی لیونل میسی نے پنالٹی ضائع کرتے ہوئے اپنے پرستاروں کو مایوس کیا، نائجیریاکو 2-0سے زیر کرنے والی کروشین ٹیم نے ارجنٹائن کو بھی چاروں شانے چت کردیا، لیونل میسی ایک بار پھر ناکام رہے، نائجیریا نے احمد موسٰی کے 2گولز کی بدولت کامیابی حاصل کرتے ہوئے ارجنٹائن کو گروپ میں آخری پوزیشن پر دھکیل دیا۔گروپ ”ای“میں بھی سب سے بڑی ٹیم برازیل کی کارکردگی توقعات کے مطابق نہیں رہی، 5بار کے چیمپئن ملک کی ٹیم سوئٹزرلینڈ کیخلاف مقابلہ 1-1سے برابر ہونے کے بعد کوسٹا ریکا کیخلاف انجری ٹائم میں فلیپی کوٹنہو اور نیمار کے گولز کی مدد سے سرخرو ہوئی، سوئس ٹیم نے سربیا کو 2-1سے ہرا کر پیش قدمی جاری رکھی،سربیا نے کوسٹاریکا کو ہراکر پیش قدمی تمام کردی۔گروپ ”ایف“ میں میکسیکو نے دفاعی چیمپئن جرمنی کیخلاف 1-0سے فتح کیساتھ دنیائے فٹبال کو حیران کیا، سوئیڈن نے جنوبی کوریاکی مزاحمت 1-0سے کچل کر فاتحانہ آغاز کیا، میکسیکو نے کوریا کو بھی 2-1سے نیچا دکھاتے ہوئے اپنا راستہ صاف کیا،جرمنی اور سوئیڈن میچ میں جرمنی نے انتہائی سنسنی خیز مقابلے کے بعد آخری لمحات میں سویڈن کو ایک کے مقابلے میں دو گول سے شکست دیدی،گروپ ”جی“ میں بیلجیئم کی ٹیم نے پاناما کو باآسانی 3-0سے زیر کیا، انگلینڈ نے ہیری کین نے دوگول داغ کرتیونس کیخلاف 2-1سے فتح میں اہم کردار ادا کیا،بیلجیئم نے تیونس کو 5-2سے ہراکر گروپ میں ٹاپ پر جگہ بنائی۔گروپ ”ایچ“ میں جاپان نے کولمبیا کا 2-1سے شکار کیا، سینگال نے پولینڈ کو اسی مارجن سے زیر کرلیا، اس پول کے مزید میچز کا نتیجہ سامنے آنے پر واضح ہوگا کہ جاپان اگلے مرحلے تک رسائی حاصل کرنے میں سرخرو ہوتا ہے یا نہیں۔