انڈر 19 ایشیا کپ کی فاتح کرکٹ ٹیم وطن واپس پہنچ گئی،
اسلام آباد ایئرپورٹ پر پُرتپاک استقبال،
کھلاڑیوں اور سپورٹ سٹاف کا استقبال پی سی بی چیف اپریٹنگ افیسر سمیر احمد سید، ڈائریکٹر ہائی پرفارمنس عاقب جاوید اور دیگر پی سی بی حکام نے کیا۔
انڈر 19 ایشیا کپ کے فائنل میں بھارت کو عبرتناک شکست سے دوچار کرنے والی قومی کرکٹ ٹیم وطن واپس پہنچ گئی ہے، جہاں شائقین کی بڑی تعداد نے ٹیم کا پرتپاک استقبال کیا۔
وفاقی وزیر مملکت بلال اظہر کیانی ٹیم کے استقبال کے لیے ایئرپورٹ پہنچے، جبکہ ڈپٹی کمشنر اسلام آباد بھی سیکیورٹی امور کا جائزہ لینے کے لیے ہوائی اڈے پر موجود تھے۔
قومی ایئر لائن کی خصوصی پرواز نے ساڑھے 12 بجے اسلام آباد ایئرپورٹ پر لینڈ کرنا تھا، تاہم پرواز کچھ تاخیر کا شکار ہوگئی اور ایک بجکر 15 منٹ پر لینڈنگ کی۔
سرد موسم کے باوجود ایئرپورٹ کے باہر شائقین کرکٹ کی بڑی تعداد ٹیم کے استقبال کے لیے موجود رہی، اور اس موقع پر منچلے نوجوان ڈھول کی تھاپ پر رقص کرتے رہے، جبکہ سمیر منہاس سمیت دیگر کھلاڑیوں کے نعرے بھی لگائے گئے۔
بعد ازاں کھلاڑی خصوصی بس میں بیٹھ کر ہوٹل کی طرف روانہ ہو گئے، شائقین کرکٹ اس موقع پر بھی ہاتھ ہلا کر کھلاڑیوں کو ویلکم کہتے رہے، اور خراج تحسین پیش کیا۔
یاد رہے کہ دبئی میں کھیلے گئے ایشین کرکٹ کونسل (اے سی سی) انڈر 19 ایشیا کپ کے فائنل میں پاکستان نے سمیر منہاس کی شاندار بیٹنگ کی بدولت بھارت کو 191 رنز کے واضح فرق سے شکست دی۔
ابتدائی طور پر پاکستان انڈر 19 ٹیم پیر کی صبح زمبابوے روانہ ہونے والی تھی، لیکن اب روانگی کا شیڈول ایک دن مؤخر کردیا گیا ہے۔
میڈیا رپورٹس کے مطابق انڈر 19 ٹیم کی اس کامیابی پر آج ان کے اعزاز میں عشائیے کا اہتمام بھی کیا گیا ہے، جہاں وزیراعظم شہباز شریف خود کھلاڑیوں سے ملاقات کریں گے۔
