پاکستان مردوں کی قومی ٹیم پہلی بار فیفا کے زیرِ اہتمام ایونٹ میں شرکت کے لیے تیار
مردوں کی قومی ٹیم فیفا آسیان کپ میں حصہ لے گی ; ٹورنامنٹ ستمبر اور اکتوبر میں منعقد ہوگا
پاکستان مردوں کی قومی ٹیم پہلی بار فیفا کے زیرِ اہتمام ایونٹ میں شرکت کے لیے تیار
مردوں کی قومی ٹیم فیفا آسیان کپ میں حصہ لے گی ; ٹورنامنٹ ستمبر اور اکتوبر میں منعقد ہوگا
“پاکستان اب اعلیٰ درجے کی ٹیموں کے درمیان اپنی جگہ بنانے کے لیے تیار ہے
” پی ایف ایف کے صدر سید محسن گیلانی
صدر سید محسن گیلانی کی قیادت میں پاکستان فٹبال فیڈریشن کے لیے تاریخی کامیابیوں کا سلسلہ جاری ہے۔
مارچ میں قومی خواتین ٹیم کی فیفا سیریز میں شرکت کے بعد اب مردوں کی قومی ٹیم بھی ستمبر میں فیفا آسیان کپ کے افتتاحی ایڈیشن میں حصہ لے کر اپنی تاریخ میں پہلی بار فیفا کے زیرِ اہتمام ایونٹ میں شرکت کرے گی۔
پاکستان اُن 14 ٹیموں میں شامل ہے جو اس نئے ٹورنامنٹ میں شریک ہوں گی، جبکہ شاہینز اُن تین مدعو ٹیموں میں شامل ہیں جو آسیان خطے سے باہر سے اس ٹورنامنٹ میں شریک ہوں گی۔ دیگر 11 ٹیمیں جنوب مشرقی ایشیا سے تعلق رکھتی ہیں۔
پی ایف ایف کے صدر سید محسن گیلانی نے کہا: “پاکستان فٹبال فیڈریشن فیفا کے صدر جیانی انفینتینو کی تہہ دل سے مشکور ہے کہ انہوں نے مختصر عرصے میں ہمیں دوسرے فیفا ایونٹ میں شرکت کا موقع فراہم کیا۔
“قومی خواتین ٹیم کی فیفا سیریز میں شرکت کے بعد اب ہماری مردوں کی قومی ٹیم بھی اپنی تاریخ میں پہلی بار فیفا کے زیرِ اہتمام ایونٹ میں میدان میں اترنے جا رہی ہے۔ “میں نے اپنے انتخابی منشور میں وعدہ کیا تھا کہ پاکستان فٹبال کو نئی بلندیوں تک لے جائیں گے،
تاریخی کامیابیاں حاصل کریں گے اور ہماری قومی ٹیموں کو ایسے عالمی مواقع فراہم کریں گے جو ماضی میں کبھی میسر نہیں آئے۔ آج ہم اس وعدے کو عملی شکل اختیار کرتے دیکھ رہے ہیں۔
“فیفا آسیان کپ ہماری مردوں کی قومی ٹیم کے لیے ایک غیر معمولی موقع ہے کہ وہ ستمبر اور اکتوبر کے سولہ روزہ بین الاقوامی ونڈو کے دوران جنوب مشرقی ایشیا کی بہترین ٹیموں کے خلاف اعلیٰ معیار کے مسابقتی مقابلوں میں حصہ لے۔
“یہ اس بات کا بھی ثبوت ہے کہ ہم اپنی قومی ٹیموں کو ہر ممکن موقع پر مضبوط اور مسابقتی بین الاقوامی مقابلے فراہم کرنے کے اپنے عزم پر قائم ہیں۔”
فیفا کے صدر جیانی انفینتینو نے کہا: “فیفا آسیان کپ کا آغاز مردوں کی قومی ٹیموں کو بین الاقوامی میچ کیلنڈر کے دوران مزید مسابقتی مواقع فراہم کرنے کے لیے کیا گیا ہے تاکہ کھلاڑی علاقائی حریفوں کے خلاف اپنے ممالک کی نمائندگی کر سکیں۔
یہ ٹورنامنٹ جنوب مشرقی ایشیا میں فٹبال کے روابط کو مزید مضبوط بنائے گا اور خطے بھر کے شائقین کو عالمی معیار کے مقابلوں سے لطف اندوز ہونے کا موقع فراہم کرے گا۔”
فیفا آسیان کپ کا مقصد اعلیٰ معیار کے بین الاقوامی مقابلوں کا انعقاد، علاقائی تعاون کو فروغ دینا اور شائقین کے لیے کھیل سے جڑنے کے نئے مواقع پیدا کرنا ہے۔
ٹورنامنٹ دو ڈویژنز پر مشتمل ہوگا۔ ڈویژن ون کے مقابلے فیفا آسیان کپ کے نام سے انڈونیشیا میں منعقد ہوں گے، جبکہ ڈویژن ٹو کے مقابلے فیفا آسیان چیلنج کپ کے تحت ہانگ کانگ، چین میں کھیلے جائیں گے۔
ڈویژن ون میں میزبان انڈونیشیا کے علاوہ پاکستان، ویتنام، ملائیشیا، بھارت، فلپائن، سنگاپور اور تھائی لینڈ شریک ہوں گے، جبکہ ڈویژن ٹو میں میزبان ہانگ کانگ، چین کے ساتھ برونائی دارالسلام، کمبوڈیا، لاؤس، میانمار اور تیمور لیستے حصہ لیں گے۔
فیفا/کوکا کولا مردوں کی عالمی رینکنگ کی بنیاد پر ٹیموں کو گروپس میں تقسیم کیا جائے گا تاکہ پورے ٹورنامنٹ میں مسابقتی توازن برقرار رہے۔
پاکستان کو ڈویژن ون کے گروپ بی میں ویتنام، تھائی لینڈ اور فلپائن کے ساتھ رکھا گیا ہے۔
پاکستان کے ڈویژن میں چار، چار ٹیموں پر مشتمل دو گروپس ہوں گے، جہاں ہر ٹیم اپنے گروپ کی دیگر تین ٹیموں کے خلاف ایک، ایک میچ کھیلے گی۔
گروپ مرحلے کے اختتام پر دونوں گروپس کی فاتح ٹیمیں فائنل میں ٹرافی کے لیے مدمقابل ہوں گی، جبکہ ہر گروپ میں دوسری پوزیشن حاصل کرنے والی ٹیمیں تیسری پوزیشن کے میچ میں آمنے سامنے آئیں گی۔
اختتام پر سید محسن گیلانی نے کہا: “اب بڑے خواب دیکھنے کا وقت آ گیا ہے۔ ہم صرف ترقیاتی نوعیت کے مقابلوں تک محدود رہنے پر مطمئن نہیں۔ پاکستان اب اعلیٰ درجے کی ٹیموں کے درمیان اپنی جگہ بنانے کے لیے تیار ہے۔ پاکستانی فٹبال عالمی منظرنامے پر اپنی شناخت قائم کر رہا ہے۔”
