ایسٹرڈ سیروٹ نے سنگلز کا ٹائٹل جیت لیا، جبکہ یوڈپچ اور رو ژی وو نے ڈبلز کا تاج اپنے نام کر لیا

ایسٹرڈ سیروٹ نے سنگلز کا ٹائٹل جیت لیا، جبکہ یوڈپچ اور رو ژی وو نے ڈبلز کا تاج اپنے نام کر لیا

اسلام آباد میں منعقدہ W-15 اسلام آباد جناح فیملی فاؤنڈیشن ورلڈ ٹینس ویمنز چیمپئن شپ 2026 کے دوسرے مرحلے کا اختتام پاکستان ٹینس فیڈریشن (PTF) ٹینس کمپلیکس، اسلام آباد میں ہوا،

جہاں فرانس کی ایسٹرڈ سیروٹ نے ویمنز سنگلز کا ٹائٹل اپنے نام کیا، جبکہ تھائی لینڈ کی کامونوان یوڈپچ اور چین کی رو ژی وو نے ویمنز ڈبلز کا ٹائٹل جیت لیا۔

فائنل مقابلوں کے نتائج

ویمنز سنگلز فائنل:
ایسٹرڈ سیروٹ (فرانس) نے کامونوان یوڈپچ (تھائی لینڈ) کو 3–6، 6–4، 6–2 سے شکست دی۔

ویمنز ڈبلز فائنل:
کامونوان یوڈپچ (تھائی لینڈ) / رو ژی وو (چین) نے اناستاسیا کوپاروف (جرمنی) / سیویل یولدوشیوا (ازبکستان) کو 6–3، 4–6، [10–2] سے شکست دے کر ڈبلز کا ٹائٹل جیت لیا۔

اس بین الاقوامی ٹورنامنٹ میں 17 ممالک کی مجموعی طور پر 31 کھلاڑیوں نے شرکت کی۔ ان ممالک میں فرانس، چین، روس، ڈنمارک، میکسیکو، ازبکستان، جنوبی افریقہ، نیدرلینڈز، کوریا، نیپال، جاپان، ہانگ کانگ، جرمنی، تھائی لینڈ، ترکیہ، جمہوریہ چیک اور پاکستان شامل تھے۔

اس ٹورنامنٹ کی سرپرستی جناح فیملی فاؤنڈیشن نے کی، جس کا قابلِ قدر تعاون پاکستان میں بین الاقوامی ٹینس کے فروغ اور ترقی میں اہم کردار ادا کر رہا ہے۔

اختتامی تقریب میں پاکستان میں امریکہ کی ناظم الامور، محترمہ نٹالی اے بیکر نے بطور مہمانِ خصوصی شرکت کی، جبکہ جناح فیملی فاؤنڈیشن کے چیئرمین جناب انصیر جنید اور ان کی اہلیہ نے بطور مہمانانِ اعزاز شرکت کی۔ معزز مہمانوں نے ٹورنامنٹ کی فاتح کھلاڑیوں اور رنرز اَپ میں انعامات تقسیم کیے۔

پاکستان ٹینس فیڈریشن کے صدر جناب اعصام الحق قریشی اور سیکریٹری جنرل کرنل ضیاء الدین طفیل بھی اختتامی تقریب میں موجود تھے اور انہوں نے چیمپئنز اور رنرز اَپ میں انعامات تقسیم کرنے میں حصہ لیا۔

فرانس کی ٹینس کھلاڑی آراوانے رضائی کو بھی ٹینس کے لیے ان کی گراں قدر خدمات اور نمایاں کردار کے اعتراف میں ایک یادگاری شیلڈ پیش کی گئی۔

تقریب میں مختلف ممالک کے سفیروں، سفارت کاروں، پی ٹی ایف کے عہدیداران، کھلاڑیوں، کوچز، والدین اور ٹینس کے شائقین کی بڑی تعداد نے شرکت کی، جو پاکستان میں خواتین کی ٹینس اور بین الاقوامی کھیلوں کے مقابلوں میں بڑھتی ہوئی دلچسپی کی عکاسی کرتی ہے۔

پاکستان ٹینس فیڈریشن کے صدر جناب اعصام الحق قریشی نے چیمپئنز اور رنرز اَپ کو شاندار کارکردگی پر مبارک باد دی۔ انہوں نے محترمہ نٹالی اے بیکر، جناب انصیر جنید اور ان کی اہلیہ سمیت تمام معزز مہمانوں کا تقریب میں شرکت پر شکریہ ادا کیا۔ انہوں نے بین الاقوامی ٹورنامنٹ کو کامیاب بنانے کے لیے جناح فیملی فاؤنڈیشن کے قابلِ قدر تعاون کو بھی سراہا۔

اس چیمپئن شپ کا کامیاب انعقاد پاکستان ٹینس فیڈریشن کی خواتین کی ٹینس کو فروغ دینے، پاکستانی کھلاڑیوں کو بین الاقوامی سطح پر مقابلے کے مواقع فراہم کرنے اور بین الاقوامی ٹینس ایونٹس کے میزبان کے طور پر پاکستان کی حیثیت کو مزید مستحکم کرنے کی جاری کوششوں میں ایک اور اہم سنگِ میل ہے۔