اقربا پروری کے الزامات،بورڈ انضمام الحق کے ساتھ کھڑا ہو گیا

لاہور(سپورٹس لنک رپورٹ)قومی ٹیم کے چیف سلیکٹر کو انڈر 19 کرکٹ ٹیم میں بیٹے کی شمولیت کے حوالے سے اقربا پروری کے الزامات کے بعد پاکستان کرکٹ بورڈ نے قومی ٹیم کے سابق کپتان انضمام الحق کو مکمل تعاون کی یقین دہانی کرائی ہے۔گزشتہ روز سابق ٹیسٹ کرکٹر عبدالقادر کے حوالے سے ایک خبر سامنے آئی تھی کہ انہیں پاکستان جونیئر سلیکشن ٹیم کے سربراہ باسط علی نے فون پر بتایا کہ انضمام الحق اپنے بیٹے ابتسام الحق کو انڈر 19 ٹیم میں شامل نہ کرنے کا شکوہ کر رہے ہیں۔دوسری جانب باسط علی کا کہنا ہے کہ انہیں انضمام الحق کی جانب سے اس طرح کا کوئی ٹیلی فون نہیں آیا۔اس بیان کے سامنے آنے کے بعد انضمام الحق نے اپنا ایک ویڈیو بیان جاری کیا جس میں انہوں نے اس الزام کی تردید کرتے ہوئے کہا کہ اگر ان پر یہ الزام ثابت ہو گیا تو وہ اپنے عہدے سے استعفیٰ دیدیں گے اور اگر مجھ پر اقربا پروری کا الزام ثابت نہ ہوا تو جو کرکٹر ان پر الزام لگا رہا ہے وہ بھی اپنے عہدے سے مستعفی ہو جائے گا۔الزامات اور سوشل میڈیا اور میڈیا پر ہونے والی تنقید کے بعد آج چیئرمین پی سی بی احسان مانی اور چیف سلیکٹر انضمام الحق کے درمیان ملاقات ہوئی جس میں اس معاملے پر تفصیلی تبادلہ خیال کیا گیا۔چیئرمین پی سی بی احسان مانی نے قومی ٹیم کے چیف سلیکٹر انضمام الحق کو مکمل حمایت اور تعاون کا یقین دلایا۔