SportsLink PK Latest Sports News in Urdu
برسبین (سپورٹس لنک رپورٹ)قومی ٹیم کے نوجوان بلے باز بابر اعظم کے لیے آسٹریلین فاسٹ باؤلر جوش ہیزل وُڈ ڈراؤنا خواب بن گئے اور نوجوان بلے باز کا آسٹریلین فاسٹ باؤلر کے ہاتھوں آؤٹ ہونے کا سلسلہ تھمنے کا نام نہیں لے رہا۔برسبین میں پاکستان اور آسٹریلیا کے درمیان کھیلے جا رہے سیریز کے پہلے ٹیسٹ میچ کے دوران پاکستانی ٹیم کو بابر اعظم سے بہت توقعات وابستہ تھیں کیونکہ سیریز سے قبل انہوں نے ٹور میچوں میں اچھی فارم کا ثبوت دیا تھا۔
تاہم میچ میں جس وقت پاکستانی ٹیم انتہائی مشکل صورتحال سے دوچار تھی اور اسے بابر سے اچھی اننگز کی توقع تھی لیکن نوجوان بلے باز چوتھی ہی گیند پر صرف ایک رنز بنانے کے بعد غیرضروری شاٹ کھیلتے ہوئے وکٹ دے بیٹھے۔اس کے ساتھ ہی بابر کا ہیزل وُڈ کے خلاف خراب کارکردگی کا سلسلہ جاری رہا اور وہ ایک طریقے سے نوجوان بلے باز کے لیے ڈراؤنا خواب بن گئے ہیں۔
گزشتہ دورہ آسٹریلیا کے دوران بھی ہیزل وُڈ نے بابر کو چار مرتبہ آؤٹ کیا تھا اور اس وکٹ کے ساتھ ہی وہ پانچویں مرتبہ انہیں آؤٹ کرنے میں کامیاب رہے۔اب تک آسٹریلیا میں کھیلے گئے میچوں میں ہیزل وُڈ نے پاکستان کے ٹی20 کپتان کو ٹیسٹ میچوں میں 36 گیندوں میں صرف 16 رنز دے کر 5 مرتبہ آؤٹ کیا جو ان کی پاکستانی بلے باز پر نفسیاتی برتری کا منہ بولتا ثبوت ہے۔
جوش ہیزل وُڈ نے بابر کی وکٹ لینے پر خوشی کا اظہار کرتے ہوئے کہا کہ ہم جانتے ہیں وہ ایک اسٹروک میکر ہیں، یہ ہماری خوش قسمتی ہے کہ جس گیند پر انہوں نے شاٹ کھیلا، اس پر گیند بلے کا باہری کنارہ لیتی ہوئی سلپ میں چلی گئی ورنہ اس گیند پر چوکا بھی ہو سکتا تھا۔
پاکستان اور آسٹریلیا کے درمیان ٹیسٹ سیریز کی ابھی مزید 3 اننگز باقی ہیں تاہم اب دیکھنا یہ ہے کہ بابر اعظم آسٹریلین فاسٹ باؤلر کے خلاف اس نفسیاتی دباؤ سے نکلنے میں کامیاب ہوتے ہیں یا پھر ہیزل وُڈ بدستور ان کے لیے ڈراؤنا خواب بنے رہیں گے۔