پاکستان سپر لیگ 7 کا ترانہ جاری کردیا گیا

پاکستان سپر لیگ (پی ایس ایل) کے ساتویں ایڈیشن کا آفیشل ترانہ عاطف اسلم اور آئمہ بیگ کی آواز میں جاری کردیا گیا۔

’آگے دیکھ’ کی تین منٹ کی ویڈیو میں گلوکاروں اور موسیقار عبداللہ صدیقی کو بھی پرفارمنس کرتے دکھایا گیا ہے۔

آفیشل ترانے کی ویڈیو میں کرکٹ کے روایتی گانوں کی طرح گلیوں میں کھیلتے بچوںِ کھیل کے میدانوں اور شائقین کے جوش و جذبے کو بھی دکھایا گیا ہے۔

’آگے دیکھ’ کی موسیقی عبداللہ صدیقی نے ترتیب دی ہے جب کہ اس کی ہدایات ذیشان پرویز نے دی ہیں اور پہلی بار عاطف اسلم نے کرکٹ کا آفیشل ترانہ گایا ہے۔

عاطف اسلم نے پہلی بار پی ایس ایل کے لیے گیت گایا ہے جب کہ آئمہ بیگ گزشتہ ریلیز ہونے والے ترانے ’گروو میرا‘ کا بھی حصہ تھیں۔

خیال کیا جا رہا تھا کہ ممکنہ طور پر اس سال بھی گزشتہ برس کی طرح نصیبو لال بھی ترانے میں واپسی کریں گی، تاہم ایسا نہیں ہو سکا۔