پنک پولو کپ 2025ء ; ریجاس /دین پولو اور ماسٹر پینٹس کی ٹیمیں فاتح رہیں۔
لاہور(سپورٹس لنک رپورٹ) جناح پولو فیلڈز کے زیراہتمام لاہور سمارٹ سٹی پنک پولو کپ 2025ء شروع ہوگیا۔ پہلے روز دو میچز کھیلے گئے جن میں ریجاس /دین پولو اور ماسٹر پینٹس کی ٹیمیں فاتح رہیں۔
تفصیلات کے مطابق سیزن کا پہلا ٹورنامنٹ پنک پولو کپ 2025ء کے پہلے روز میچز دیکھنے کیلئے تماشائیوں کی بڑی تعداد موجود تھی۔
اس موقع پر سیکرٹری جناح پولو فیلڈز میجر عادل راؤ (ر) اور پولوکے سابق کھلاڑیوں کی بڑی تعداد موجود تھی۔ سیکرٹری میجر عادل راؤ (ر) کے مطابق لاہور سمارٹ سٹی نے اس چار گول ٹورنامنٹ کو سپانسر کیا ہے
جس میں آٹھ ٹیمیں شریک ہیں۔ ہر ٹیم میں ایک لیڈی کھلاڑی بھی موجود ہے۔ پہلے میچ میں ریجاس /دین پولو کی ٹیم نے ماسٹر پینٹس بلیک کی ٹیم کو پانچویں چکر میں سڈن ڈیتھ پر 8-7 سے ہرا دیا۔
ریجاس /دین پولو کی طرف سے راجہ سمیع اللہ نے چھ گول، فیصل شہزاد اور شیخ محمد فرہاد نے ایک ایک گول سکور کیا۔
ماسٹر پینٹس بلیک کی طرف سے راجہ تیمور اور ایملیا گری بے نے تین تین گول جبکہ بلال حیات نون نے ایک گول سکور کیا۔ دوسرے میچ میں ماسٹر پینٹس نے زبردست مقابلے کے بعد دی ٹاؤن ہال کی ٹیم کو 8.5-8 گول سے ہرا دیا۔
ماسٹر پینٹس کی طرف سے آغا موسی نے چھ، بلال حئی نے دو گول سکور کیے جبکہ آدھا گول ہینڈی کیپ ایڈوانٹیج حاصل تھا۔ دی ٹاؤن ہال کی طرف سے عمر اسجد ملہی نے چھ، پاولا گری بے نے دو گول سکور کیے۔
