پاک ساؤتھ افریقہ ٹیسٹ سیریز، سیکیورٹی اور ٹریفک پلان جاری
راولپنڈی میں پاکستان اور ساؤتھ افریقہ کے درمیان کرکٹ سیریز کے موقع پر سیکیورٹی اور ٹریفک کے سخت انتظامات کر دیے گئے ہیں۔
پاکستان بمقابلہ ساؤتھ افریقہ کرکٹ سیریز کے لیے سی پی او راولپنڈی سید خالد ہمدانی کی ہدایات کے مطابق پریکٹس و کرکٹ ٹیسٹ میچ کے لئے سیکیورٹی و ٹریفک پلان جاری کردیا گیا۔
سی پی او سید خالد ہمدانی کے مطابق راولپنڈی پولیس کے 5500 سے زائد افسران سیکیورٹی فرائض سرانجام دے رہے ہیں، ٹریفک انتظامات کے لئے 367 سے زائد افسران فرائض سر انجام دے رہے ہیں۔
سی پی او کا کہنا ہے کہ سینئر افسران فیلڈ میں سیکیورٹی پر مامور فورس کو چیک اور بریف کر رہے ہیں، روف ٹاپ پر اسنائپرز تعینات کئے گئے ہیں، سی سی ٹی وی کیمروں سے مانیٹرنگ کی جا رہی ہے جس کے لیے الگ کنٹرول روم قائم کیا گیا ہے۔
انہوں نے بتایا کہ تھانوں کی موبائلز، ایلیٹ اور ڈولفن اسکواڈ اسٹیڈیم کے اطراف گشت کر رہے ہیں، شہریوں کی سہولت کے لیے موثر ٹریفک انتظامات کیے گئے ہیں، پاک ساؤتھ افریقہ ٹیسٹ کرکٹ میچ کے لئے فول پروف سیکیورٹی و ٹریفک انتظامات کو یقینی بنایا جا رہا ہے۔
یاد رہے کہ پاکستان اور جنوبی افریقہ کے درمیان ٹیسٹ سیریز کا دوسرا اور آخری میچ کل 20 اکتوبر سے پنڈی کرکٹ اسٹیڈیم میں کھیلا جائے گا۔
راولپنڈی ٹیسٹ کے لئے دونوں ٹیمیں لاہور سے اسلام آباد پہنچ چکی ہیں، کرکٹرز آج سے اسلام آباد میں پریکٹس کریں گی، دو میچز کی سیریز پاکستان کو ایک۔ صفر کی برتری حاصل ہے۔
ٹیسٹ سیریز کے دوران شائقین کا اسٹیڈیم میں داخلہ مفت رکھا گیا ہے، کرکٹ لورز اسٹیڈیم کے چار انکلوژرز سے فری میچ دیکھ سکیں گے۔
