ہاریں یا جیتیں ہم آپ کے ساتھ ہیں: محسن نقوی کا قومی ٹیم کو پیغام
دبئی: پاکستان کرکٹ بورڈ (پی سی بی) کے چیئرمین محسن نقوی نے چیمپئنز ٹرافی میں پاک بھارت ٹاکرے سے قبل کہا ہے کہ قومی ٹیم کو پیغام ہے آپ ہاریں یا جیتیں ہم آپ کے ساتھ ہیں۔
دبئی میں میڈیا سے گفتگو کرتے ہوئے محسن نقوی کا کہنا تھا کہ کل اچھا مقابلہ ہوگا اور پاکستان ٹیم پوری طرح تیار ہے، چیزیں اوپر نیچے ہوتی ہیں، کل انشااللہ پاکستان جیتے گا، اور یہ پاکستان کے لیے بڑا انعام ہوگا۔
انہوں نے کہا کہ بھارت سے پوچھیں گے کہ اگر وہ لاہور آکر کھیل رہے ہوتے تو ان کے کیا احساسات ہوتے، پاکستان نے آج 22 بھارتی ماہی گیروں کو رہا کیا ہے۔
انگلینڈ آسٹریلیا میچ کے دوران بھارتی ترانہ بجنے سے متعلق پوچھے گئے سوال کے جواب میں انہوں نے کہاکہ ایونٹ کا آرگنائزر آئی سی سی ہے۔
خیال رہے پریس کانفرنس سے قبل چیئرمین پی سی بی محسن نقوی قومی ٹیم کے کھلاڑیوں سے مل کر ان کے حوصلے بھی بڑھاتے رہے۔
واضح رہے پاکستان اور بھارت کے درمیان چیمپئنز ٹرافی کا میچ کل دبئی کرکٹ سٹیڈیم میں کھیلا جائے گا۔
