ہاکی ورلڈ کپ سے قبل پاکستان ٹیم میں بڑی تبدیلی، عماد بٹ کی جگہ ابوبکر کپتان مقرر
ہاکی ورلڈ کپ سے قبل پاکستان ہاکی فیڈریشن (پی ایچ ایف) نے قومی ٹیم کی قیادت میں اہم تبدیلی کرتے ہوئے عماد بٹ کو کپتانی سے ہٹا کرابوبکر کو نیا کپتان مقرر کردیا ہے۔
پی ایچ ایف کے مطابق ابوبکرآئندہ بین الاقوامی مقابلوں میں پاکستان ہاکی ٹیم کی قیادت کریں گے، پاکستان ہاکی فیڈریشن کے صدر محی الدین احمد وانی نے پروفیشنل ڈولپمنٹ کمیٹی کی سفارش پریہ فیصلہ کیا۔
فیڈریشن کے مطابق عماد شکیل بٹ بطورسینئرکھلاڑی قومی ٹیم کا حصہ رہیں گے اورٹیم کی بہتری کے لئے اپنا کردارادا کرتے رہیں گے۔
نئے کپتان ابوبکرپہلی مرتبہ 30 جولائی سے شروع ہونے والی کوریا کے خلاف ہوم سیریزمیں قومی ٹیم کی قیادت کریں گے۔
پی ایچ ایف نے امید ظاہر کی ہے کہ ابوبکرکی قیادت، سینئرکھلاڑیوں کے تجربے اور نوجوان کھلاڑیوں کی صلاحیتوں سے قومی ٹیم مزید مضبوط اورمتحد اندازمیں میدان میں اترے گی۔
قومی ہاکی ٹیم کیلئے یہ تبدیلی ایسے وقت میں کی گئی ہے جب پاکستان ایف آئی ایچ ہاکی ورلڈ کپ کی تیاریوں میں مصروف ہے، عالمی کپ کا آغاز 15 اگست سے ہوگا جس کی میزبانی نیدرلینڈزاوربیلجیئم مشترکہ طور پرکریں گے۔
میگا ایونٹ میں 16 ٹیمیں شرکت کریں گی جنہیں چارگروپس میں تقسیم کیا گیا ہے، پاکستان کو گروپ ڈی میں انگلینڈ، ویلزاور روایتی حریف بھارت کیساتھ رکھا گیا ہے، پاکستان اور بھارت کے درمیان سنسنی خیز مقابلہ 19 اگست کو کھیلا جائے گا۔
