اسلام آباد اکیڈمی اور گریژن کلب فٹسال چیمپئن شپ کے فائنل میں داخل

اسلام آباد (سپورٹس لنک رپورٹ )اسلام آباد اکیڈمی کلب اور گریژن کلب کی ٹیموں نے کومیکو فٹ سال چیمپیئن شپ کے فائنل کے لئے کوالیفائی کر لیا ہے ، سیمی فائنل میچوں کے مہمان خصوصی رکن قومی اسمبلی صداقت علی عباسی تھے ، اس موقع پر اسلا م آباد فٹ بال ایسوسی ایشن کے جنرل سیکرٹری سید شرافت حسین بخاری، نائب صدر محمد زمان، ٹورنامنٹ سیکرٹری حفصہ ارشد کے علاوہ شائقین کی کثیر تعداد بھی موجود تھی، پہلے سیمی فائنل میچ میں گیرژن کلب نے قائداعظم کلب کو ایک سخت مقابلے کے بعد 1-0 گول سے شکست دے کر فائنل میں جگہ بنائی، وقفے تک دونوں ٹیمیں بغیر کسی گول کے برابر رہیں دوسراہاف ختم ہونے سے چند منٹ پہلے گیرژن کلب کی جانب سے معیظ نے گول کرکے اپنی ٹیم کو برتری دلائی جو کہ مقررہ وقت تک جاری رہی

دوسرے سیمی فائنل میچ میں اسلام آباد اکیڈمی نے مہران کلب کو 3-2 پنلٹی ککس سے شکست دے کر فائنل کے لئے کوالیفائی کر لیا، پہلے ہاف کے 14 ویں منٹ میں اسلام آباد اکیڈمی کی جانب سے معیظ نے گول کرکے اپنی ٹیم کو برتری دلائی اور دوسرے ہاف کے 12 ویں منٹ میں مہران کلب کی طرف سے روح اللہ نے گول کرکے مقابلہ 1-1 گول سے برابر کردیا جو کہ میچ کے اختتام تک جاری رہا،میچ کا فیصلہ پنلٹی ککس پر ہوا ، پنلٹی ککس پر اسلام آباد اکیڈمی نے دو جبکہ مہران کلب نے ایک گول کیا