پی ایس بی نے ایف آئی ایس یو گیمز میں ایتھلیٹس کے فرار سمیت
بے ضابطگیوں تحقیقاتی کمیٹی قائم کر دی، ترجمان پی ایس بی
معاملے کی جانچ کے لئے ڈائریکٹر پی ایس بی لاہور کی سربراہی میں
تین رکنی کمیٹی قائم کر دی گئی ہے . ترجمان پی ایس بی
کمیٹی 15 یوم میں جامع رپورٹ پیش کرنے کی پابند ہوگی، ترجمان پی ایس بی
اسلام آباد ۔27 جولائی 2025 ; پاکستان سپورٹس بورڈ ( پی ایس بی ) نے جرمنی میں منعقدہ ایف آئی ایس یو ورلڈ یونیورسٹی گیمز 2025میں دو کھلاڑیوں کےلاپتہ یا فرار ہونے ، ٹیم آفیشلز کے انتخاب کے معیار ،
ڈسپلن اور لاجسٹک ایشوز کا نوٹس لیتے ہوئےمعاملے کی جانچ کے لئے ڈائریکٹر پی ایس بی لاہور کی سربراہی میں تین رکنی کمیٹی قائم کر دی ہے۔کمیٹی 15 یوم میں جامع رپورٹ پیش کرنے کی پابند ہوگی۔
ڈی جی پی ایس بی کی منظوری سے جاری ہونے والے نوٹیفکیشن کے مطابق ایف آئی ایس یو ورلڈ گیمز میں پاکستانی دستے کی شرکت میں سنگین بے ضابطگیاں سامنے آئیں جن میں ٹیم آفیشلز کے انتخاب، نظم و ضبط، لاجسٹک مسائل اور دو کھلاڑیوں کے غائب ہونے جیسے سنگین نکات شامل ہیں۔
ماسوائے ایک کوچ کے تما م ٹیم آفیشلز ایچ ای سی یا جامعات کے افسران تھے جسے سے شفافیت پر سوال اٹھے۔ایچ ای سی کے مطابق، مقابلے کے دوران دو طالبعلم ایتھلیٹس کے لاپتہ یا فرار ہونے کی اطلاع دی گئی ہے۔خواتین کے ریلے ٹیم4×400 مقابلوں کے لئے نااہل قرار دیا گیا۔ایک جوڈو ایتھلیٹ نے کوچ اور مناسب مقابلہ جاتی یونیفارم کے مقابلوں میں شرکت کی۔
ان حقائق کی روشنی میں پی ایس نے تین رکنی تحقیقاتی کمیٹی قائم کی ہے۔کمیٹی کی سربراہ ڈائریکٹر پی ایس بی لاہور نورش صباح جبکہ نصرا للہ رانا اور سیف الراحمان رائو ممبران ہونگے۔
تحقیقاتی کمیٹی ایچ ای سی کی جانب سے ایتھلیٹس اور ٹیم آفیشلز کے انتخاب کے طریقہ کار، بنیاد اور شفافیت کا جائزہ لے گی ،کمیٹی دستے میں شامل ہر آفیشل کی ذمہ داریوں کا تعین گی کہ ان کی شمولیت مروجہ اصولوں کے مطابق تھی یا نہیں ۔
کمیٹی دو ایتھلیٹس کے لاپتہ یا فرار ہونے کے حالات کی چھان بین، واقعات کا وقت وار جائزہ اور غفلت یا نااہلی کے ذمہ داران کی نشاندہی کرے گی۔کمیٹی خواتین ریلے ٹیم کی نااہلی کے اسباب کی تحقیق، تیاری، انتخاب یا نگرانی میں بھی کوتاہی کی بھی نشاندہی کرے گی۔
ٹی او آر کے مطابق کمیٹی یہ تعین بھی کرے گی کہ جوڈو ایتھلیٹ کو مقابلہ یونیفارم کیوں فراہم نہیں کیا گیا اور وہ کوچ کے بغیر کیوں شریک ہوئی۔کمیٹی بدانتظامی، غفلت یا فرائض میں کوتاہی کے مرتکب افراد کے خلاف مناسب کارروائی کی سفارش کریگی۔کمیٹی نوٹیفکیشن کے اجراء کی تاریخ سے (15) دن کے اندر ایک جامع رپورٹ پیش کرنے کی پابند ہونگی ۔
