معروف باکسر شعیب خان زہری ایک اور تاریخی سفر کیلئے تیار
استنبول میں ہونیوالی چیمپئن شپ میں بھارتی باکسر ٹھکور کمارکیخلاف رنگ میں اتریں گے
معروف باکسرشعیب خان زہری ایک اور تاریخی سفر کیلئے تیار
(ویب ڈیسک) بلوچستان کے نامور باکسر شعیب خان زہری ایک بار پھر ملک و قوم کا نام روشن کرنے کے لیے تیار ہیں۔
27 ستمبر کو ترکی کے شہر استنبول میں منعقد ہونے والی بین الاقوامی باکسنگ چیمپئن شپ میں ان کی شرکت متوقع ہے
جہاں ان کا مقابلہ معروف بھارتی باکسر ٹھکور کمار سے ہوگا، شعیب خان زہری کا شمار ان باصلاحیت باکسرز میں ہوتا ہے جنہوں نے اپنی محنت اور لگن سے بین الاقوامی سطح پر پاکستان کا نام روشن کیا ہے،
اس سے قبل بھی انہوں نے متعدد عالمی مقابلوں میں شاندار کارکردگی کا مظاہرہ کرتے ہوئے کامیابی حاصل کی جس سے نہ صرف ان کے صوبے بلکہ پورے ملک کا سر فخر سے بلند ہوا ہے۔
شعیب خان کااس حوالے سے کہنا ہے کہ اس بار بھی میں پرامیدہوں کہ اس مقابلے میں فتح حاصل کر کے بلوچستان اور پاکستان کا نام ایک بار پھر دنیا بھر میں روشن کروں گا،میں اس چیلنج کے لئے پوری طرح تیار ہوں اور اپنے ملک کی عزت کے لیے ہر ممکن کوشش کروں گا۔
یہ مقابلہ نہ صرف شعیب خان زہری کے کیریئر کے لئے اہم بلکہ پاکستانی کھیلوں کے لئے بھی ایک سنگ میل ثابت ہو سکتا ہے، شعیب خان زہری کی مسلسل کامیابی نوجوانوں کھلاڑیوں کے لئے ایک مثال ہیں اور انہیں کھیلوں کے میدان میں آگے بڑھنے کی ترغیب ترغیب دے گی،
پوری قوم کی نظریں اس باصلاحیت باکسر پر لگی ہیںجو ایک بار پھر اپنی صلاحیتوں کا لوہا منوانے کے لیے تیار ہے۔
