بنگلہ دیش نے پہلے ٹی ٹوئنٹی میں جیت کیلئے پاکستان کو 142 رنز کا ہدف دیدیا

لاہور(سپورٹس لنک رپورٹ ) تین ٹی ٹونٹی میچز کی سیریز کے پہلے مقابلے میں بنگلہ دیش نے پاکستان کو جیت کے لیے 142رنز کا ہدف دیدیا ہے ۔ قذافی سٹیڈیم ،لاہور میں کھیلے جارہے میچ میں بنگلہ دیشی کپتان محمود اللہ ریاض نے ٹاس جیت کر پہلے بلے بازی کا فیصلہ کیا جسے اس کے اوپنرز تمیم اقبال اور محمد نعیم نے درست ثابت کرتے ہوئے پہلی وکٹ کے لیے71رنز جوڑے،تمیم اقبال39رنز بنا کر محمد رضوان کے ہاتھوں رن آؤٹ ہوگئے

لٹن داس بھی 12رنز بنا کر شاداب خان کی جانب سے اپنی ہی گیند پر بہترین فیلڈنگ کے نتیجے میں رن آؤٹ ہوگئے ،محمد نعیم بھی43رنز بنا کر شاداب خان کی گیند پر چھکا لگانے کی کوشش میں باؤنڈری لائن پر کیچ آؤٹ ہوگئے ،حارث رؤف نے عفیف حسین کو کلین بولڈ کرکے اپنی پہلی انٹر نیشنل وکٹ حاصل کی ، شاہین آفریدی نے سومیا سرکار کو کلین بولڈ کرکے اپنی پہلی وکٹ حاصل کی، محمود اللہ اور محمد مٹھن نے ٹیم کا سکور 141 رنز تک پہنچایا ، پاکستان کے لیے شاہین آفریدی ،شاداب خان اور حارث روف نے ایک، ایک وکٹ لی -قومی ٹیم میں احسان علی اور حارث رؤف ڈیبیو کریں گے جب کہ دیگر کھلاڑیوں میں (کپتان) بابراعظم، محمد حفیظ ، شعیب ملک، افتخار احمد، محمد رضوان، عماد وسیم ، شاداب خان ، حارث رؤف ، شاہین شاہ آفریدی اور محمد حسنین شامل ہیں۔

ٹی ٹونٹی فارمیٹ میں بنگلہ دیش کے خلاف پاکستان کی جیت کا تناسب 80 فیصد ہے۔ پاکستان نے اب تک 10 میچوں میں سے 8 جیتے اور صرف 2 ہارے ہیں۔ پہلے ٹی ٹوئنٹی میچ میں احسن رضا اور شوزوب رضا امپائرنگ کے فرائض سرانجام دیں گے جبکہ سری لنکا کے رانجن مدوگالے میچ ریفری ہوں گے۔